ცქიტიშვილი ანაკლიაზე: თუ ცვლილებებზე დავთანხმდებით, სახელმწიფოს მოუწევს სესხის სრულად უზრუნველყოფა

ანაკლიის პორტის მშენებლობას საფრთხე არ ემუქრება. ხელისუფლების მხრიდან ამ გზავნილის კიდევ ერთხელ დადასტურების მიუხედავად, ოპოზიცია ცდილობს, ამ პროექტს ხაზარაძე-ჯაფარიძის სამართლებრივი საქმე დაუკავშიროს, - ამის შესახებ  მაია ცქიტიშვილმა პარლამენტში განაცხადა, სადაც დეპუტატების კითხვებს პასუხობს.

კითხვა-პასუხამდე რეგიონული განვითარებისა და ინფრასტრუქტურის მინისტრმა საპარლამენტო ტრიბუნიდან პორტის შესახებ კიდევ ერთხელ დეტალურად ილაპარაკა. მაია ცქიტიშვილის თქმით, არასწორად ყალიბდება საზოგადოებრივი აზრი, თითქოს პორტის საკითხი კონსორციუმის ცალკეული დამფუძნებლების მიმართ გაჩენილ კითხვას უკავშირდება და ანაკლიის პორტის მშენებლობით საქართველოს მთავრობა არ არის დაინტერესებული. ვიცეპრემიერის შეფასებით, ამ საკითხით პოლიტიკურმა სპეკულაციამ ბევრი ვერსია გააჩინა, მათ შორის უშუალოდ ანაკლიის პორტის მშენებლობის დამაზარალებელი მოსაზრებებიც.

ასევე ვიცეპრემიერი ანაკლიის პორტის მშენებლობასა და საერთაშორისო საფინანსო ორგანიზაციების მოთხოვნებთან დაკავშირებით პარლამეტში განმარტებებს აკეთებს. როგორც რეგიონული განვითარებისა და ინფრასტრუქტურის მინისტრმა აღნიშნა, ბანკები ბევრ ისეთ ცვლილებას ითხოვენ, რომელიც თავდაპირველად განსაზღვრული არ ყოფილა.

"ერთ-ერთი მოთხოვნა ეხება პორტთან დამაკავშირებელ გზას და რკინიგზას. ამ ნაწილში ბანკების მოთხოვნაა, რომ სამუშაოები, განსახლება და ყველა პროცესი, წარიმართოს დონორების წესების შესაბამისად, რაც თავდაპირველად არ იყო გათვალისწინებული. ჩვენ გზა და რკინიგზა უნდა ავაშენოთ სახელმწიფო დაფინანსებით, რაც გვიხსნის დონორების პროცედურების დაცვის ვალდებულებას. ეს მნიშვნელოვანია, რადგან არსებული სამუშაოების გრაფიკი ამას არ ითვალისწინებს“, - აღნიშნა მაია ცქიტიშვილმა.

ვიცეპრემიერის თქმით, მეოთხე მოთხოვნა სასესხო ხელშეკრულებას ეხება. სახელმწიფოს დღეს აქვს უფლება დაამტკიცოს საკრედიტო ხელშეკრულებების პირობები, ხოლო ბანკების წინადადებაა, მთავრობას მხოლოდ სესხის ოდენობა და ვადა შეუთანხმდეს. მისი შეფასებით, ერთ-ერთი მთავარი პრობლემა, რომელიც ბანკების მხრიდან არის დასახელებული, ეს არის ხელშეკრულების შეწყვეტა და კომპენსაციის რეჟიმი ინვესტორის დეფოლტის შემთხვევაში. 

"ეს ეხება უშუალოდ მთელი სესხის უზრუნველყოფას. ამ ეტაპზე, ჩვენ გვაქვს გათვალისწინებული პირობა, რომლის მიხედვითაც თუ ხელშეკრულება წყდება, მთავრობის მიერ ვალდებულებების შეუსრულებლობის ან ინვესტორის მიზეზით, პორტი ბრუნდება სახელმწიფო საკუთრებაში, იწყება ხელახლა ინვესტორის მოძიება და ის ვალდებულებები, რომლებიც ინვესტორს აქვს აღებული ბანკების წინაშე, გადადის სხვა  ინვესტორზე.  ამ ეტაპზე, ბანკების მოთხოვნაა სესხების გარანტი იყოს სახელმწიფო. იმ შემთხვევაში თუ ხელშეკრულება გაწყდება სახელმწიფოს ბრალით, 400 მილიონი სესხის დაფარვა მოხდეს დაუყოვნებლივ სახელმწიფოს მიერ, ხოლო თუ ინვესტორის გამო მოხდება ხელშეკრულების გაწყვეტა, სახელმწიფომ ეს სესხი სრულად აუნაზღაუროს ბანკებს 4 წლის განმავლობაში“, - აღნიშნა მაია ცქიტიშვილმა.

ვიცეპრემიერის შეფასებით, თუ მთავრობა ამ ცვლილებებზე დათანხმდება, სახელმწიფოს უწევს ინვესტორის კომერციული რისკების აღება და პრაქტიკულად, სესხის სრულად უზრუნველყოფა.