ანაკლიის პორტის შესახებ დეპუტატების შეკითხვებს მაია ცქიტიშვილმა უპასუხა. მთავარი

ინფრასტრუქტურის მინისტრი მაია ცქიტიშვილი  რამდენიმე საათის განმავლობაში პარლამენტის სესიაზე დეპუტატების კითხვებს პასუხობდა. მთავარი თემა ანაკლიის ღრმაწყლოვანი პორტი იყო.

მინისტრმა დეტალურად აღწერა ყველა შეუსრულებელი ვალდებულება, რომელიც ანაკლიის განვითარების კონსორციუმის პასუხისმგებლობა იყო. ილაპარაკა იმაზეც, რამდენჯერ და რა მიზეზით ითხოვა კონსორციუმმა ხელშეკრულებით დადგენილი ვადების გადავადება. ვიცეპრემიერის განცხადებით, სახელმწიფო სესხების გამცემი ბანკების მოთხოვნებზე წასვლას და გადამხდელების ხარჯზე პასუხისმგებლობის აღებას არ აპირებს.

ანაკლიის პორტის მშენებლობას საფრთხე არ ემუქრება ეს იყო მინისტრის მთავარი გზავნილი საპარლამენტო ტრიბუნიდან. მას კითხვა 36-მა დეპუტატმა დაუსვა.ვიცეპრემიერმა პასუხი გასცა ასევე ფოთის პორტისა და ანაკლიის პორტის შესახებ დასმულ შეკითხვას.

"როდესაც ანაკლიის პროექტი დავიწყეთ ფოთის და ბათუმის პორტები უკვე არსებობდა და ამის შესახებ იცოდა  როგორც ანაკლიის განვითარების კონსორციუმმა, ისე იმ 12-მა კომპანიამ, რომელმაც გამოთქვა ინტერესი. ასე, რომ ეს არავისთვის ყოფილა სიახლე.  უფრო მეტიც - ფოთი, რამდენიმე წლის განმავლობაში აცხადებს გეგმებს გაფართოების შესახებ, სამწუხაროდ ამ გეგმების რეალიზაციას ჩვენ ვერ ვხედავთ. ფოთის და ბათუმის პორტების პრივატიზება თქვენი ხელისუფლების დროს განხორციელდა  და კარგად იცით, რომ ამ ხელშეკრულებებში არ არის ჩადებული არანაირი პირობა იმისათვის, რომ სახელმწიფომ რამენაირად შეზღუდოს ამ პორტების საქმიანობა და როდესაც თებერვალში გამოცხადდა კონსორციუმი გამარჯვებულად, მარტში უკვე მოგვმართა თხოვნით, რომ ანაკლიის ღრმაწყლოვანი პორტისთვის მიგვენიჭებინა ექსკლუზივი და ჩვენ რა თქმა უნდა ვთქვით უარი. ამიტომ დღეს რა განცხადებებიც კეთდება, რომ ფოთის პორტს, ჩხარტიშვილს, ივანიშვილს ან კიდევ სხვას აქვს ინტერესი -  არის სპეკულაცია,“- განაცხადა მინისტრმა პლენარულ სხდომაზე.  

ცქიტიშვილმა ასევე აღნიშნა, რომ ერთი ინვესტორის სასარგებლოდ სხვა ინვესტორისა და სხვა კერძო ოპერატორის უფლებების შეზღუდვა მიუღებელია.

"თავიდანვე იყო განსაზღვრული, რომ ანაკლიის ღრმაწყლოვან პორტს უნდა შეექმნა ტვირთების დამატებითი ნაკადი. და როდესაც ჩვენ გვესმის, რომ ფოთის პორტი ამუშავებს შავ ზღვაზე არსებული გემების მხოლოდ 25 % -ს, ეს ნიშნავს, რომ არ გვაქვს შესაბამისი პარამეტრების და ტექნიკური აღჭურვილობის პორტები, ეს არ ეხება მხოლოდ სიღრმეს, ეხება ასევე საფასო პოლიტიკას, მომსახურების ხარისხს და ა.შ. ანაკლიის პორტს სწორედ ეს ნაკადები უნდა შეექმნა და ამიტომ ვსაუბრობთ ანაკლიის განსაკუთრებულ შესაძლებლობაზე, როგორც ეკონომიკური ისე უსაფრთხოების თვალსაზრისით“  -  აღნიშნა მინისტრმა პარლამენტში გამოსვლისას.

მაია ცქიტიშვილს პარლამენტში "მინისტრის საათის" ფორმატში მოუსმინეს.