გვენეტაძემ „თიბისი ბანკის“ საქმეზე განმარტება კიდევ ერთხელ გააკეთა

პარლამენტში ეროვნული ბანკის პრეზიდენტს უსმენენ. გამოსვლის მთავარი თემა საბანკო რეგულაციები და "თი ბი სის" პროცესებია, თუმცა სხდომაზე ხმაური ჯერ კიდევ კობა გვენეტაძის მოხსენებამდე დაიწყო.

ეროვნული ბანკის პრეზიდენტის ტრიბუნასთან გამოჩენისთანავე, პროცედურებთან დაკავშირებით, სიტყვა ევროპული საქართველოს დეპუტატმა ირმა ნადირაშვილმა ითხოვა. მან კობა გვენეტაძეს ჰკითხა მივიდოდა თუ არა ის კომიტეტის სხდომაზეც. სწორედ ამ კითხვას მოჰყვა ხმაური დარბაზში. 

როგორც პარტიის წევრებმა კობა გვენეტაძეს მიმართეს, ახალი რეგლამენტის მიხედვით, მას ნებისმიერ შემთხვევაში მოუწევს კომიტეტზე მისვლა.

„არა მხოლოდ ჩვენ, „ევროპულ საქართველოს“, რომლებმაც თქვენი მოსვლა მოვითხოვეთ კომიტეტზე, არამედ ბატონმა კობამ ყველას, მთელ პარლამენტს უნდა მოგვახსენოს, ანუ თქვენ კანონზე მაღლა აყენებთ თქვენს თავს, ბატონო კობა? პირდაპირ უთხარით აი ამ ხალხს, პარლამენტის თავმჯდომარეს, რომ უბრალოდ ფეხებზე გკიდიათ ჩვენ მიერ მიღებული კანონის მოთხოვნები, როცა ეს თქვენ გეხებათ. გაბედეთ და გვითხარით“, - მიმართა გიგა ბოკერიამ კობა გვენეტაძეს.

ეროვნულ ბანკში ჩემი მოსვლის შემდეგ და მანამდეც, „თიბისი ბანკის“ ზედამხედველობის მიმართულებით ყველაზე მნიშვნელოვანი საკითხი სწორედ დაკავშირებული პირების დაკრედიტება და ინტერესთა კონფლიქტთან დაკავშირებული სხვა საკითხები იყო, - ამის შესახებ კობა გვენეტაძემ პარლამენტის სხდომაზე განაცხადა.

"ბანკის დამფუძნებელი ადმინისტრატორების ბიზნესებთან დაკავშირებული ინტერესთა კონფლიქტის შემთხვევების გამო ბოლო წლებში ეროვნულ ბანკს არაერთხელ მოუწია ზომების მიღება, თუმცა ჩვენ ამ თემებზე საჯაროდ არ ვსაუბრობთ, ვინაიდან საზედამხედველო ღონისძიებები კონფიდენციალურია. „თიბისი ბანკში“ ინტერესთა კონფლიქტთან დაკავშირებული საკითხების მოგვარებას ჩვენ, პირველ რიგში, სამეთვალყურეო საბჭოს გაძლიერებითა და დამოუკიდებელი წევრების როლის გაზრდით ვცდილობდით. სწორედ სამეთვალყურეო საბჭოს მოვალეობაა ბანკის აქციონერების ინტერესების დაცვა, რასაც საბჭო ჯეროვნად ვერ ახერხებდა თავმჯდომარისა და მისი მოადგილის დომინანტური გავლენის გამო. ეს ყველაფერი2018 წლის შემოწმებით არ დაწყებულა. ეს დაიწყო გაცილებით ადრე და 2019 წელს მიღებულ გადაწყვეტილებამდე მიგვიყვანა,“ - თქვა სების პრეზიდენტმა.

დღევანდელ სასესიო მოსმენაზე, კობა გვენეტაძემ აღნიშნა, რომ თიბისი ბანკს არსებული რისკების შესახებ ჯერ კიდევ ერთი წლის წინ აფრთხილებდა: „2018 წლის 22 თებერვალს, ანუ მანამ, სანამ, ცნობილი გახდებოდა დღეს უკვე ყბადაღებული 17 მილიონი დოლარი სესხის ამბავი, თიბისი ბანკს გავუგზავნეთ ოფიციალური წერილი.

კობა გვენეტაძის განცხადებით, აქციონერებმა 2008 წელს რისკის ქვეშ დააყენეს თიბისი ბანკის დეპოზიტარები, განსაკუთრებით იმ პერიოდში, როდესაც ქვეყანაც და საფინანსო სექტორიც მნიშვნელოვანი პრობლემების წინაშე იყო.

"ტრანზაქციების ანალიზმა, რომლითაც ბანკის მსხვილმა აქციონერებმა ინტერესთა კონფლიქტის მარეგულირებელი კანონმდებლობის მოთხოვნების უხეში დარღვევებით კომპანიების „სამგორი M"და „სამგორი თრეიდი" გამოყენებით ბანკიდან 17 მილიონ დოლარამდე თანხა ისესხეს, დაადასტურა, რომ ეროვნული ბანკის ეჭვები საფუძვლიანი იყო. ამ ტრანზაქციებით აქციონერებმა 2008 წელს რისკის ქვეშ დააყენეს თიბისი ბანკის დეპოზიტარები, განსაკუთრებით იმ პერიოდში, როდესაც ქვეყანაც და საფინანსო სექტორიც მნიშვნელოვანი პრობლემების წინაშე იყო,"- თქვა გვენეტაძემ.

გვენეტაძის თქმითვე, მამუკა ხაზარაძის განცხადება, რომ მას ბანკი წაართვეს - სიმართლეს არ შეესაბამება. "მათი წილები ბანკში უცვლელია,"- თქვა სების პრეზიდენტმა.

21 თებერვალს ცნობილი გახდა, რომ „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის.