პრემიერი: საქართველოში 600 ათასი ადამიანი დაცულია კრედიტორების წნეხისაგან

„დღეს საქართველოში 600 ათასი ადამიანი დაცულია კრედიტორების წნეხისაგან. აღდგენილია სამართლიანი თამაშის წესები. მოხდა საპროცენტო განაკვეთების დაწევა იპოთეკურ სესხებზე. შემცირდა 3-4%-ით. სესხებზე არის განსაზღვრული საპროცენტო განაკვეთის ჭერი“ - ეს განცხადება საქართველოს პრემირემინისტრმა მამუკა ბახტაძემ ტელეკომპანია „იმედში“ გადაცემა „ქრონიკის“ პირდაპირ ეთერში გააკეთა. 

საქართველოს პრემიერმინისტრის შეფასებით, ხელისუფლებამ მიიღო უმძიმესი მემკვიდრეობა: 

„ჩვენ მივიღეთ უმძიმესი მემკვიდრეობა როცა თითოეული მოქალაქე იყო დაუცველი კრედიტორების მიმართ. იყო 700-800%-იანი სესხები. შეიძლება ადამიანს სესხის 90%-ი ჰქონოდა გასტუმრებული და დაერიცხათ 50 ათასიანი ჯარიმა. მას დაეკარგა სახლი, მანქანა და პერსპექტივა.“ 

მამუკა ბახტაძის შეფასებით, ხელისუფლებამ გადადგა სწორი ნაბიჯები, როცა საფინანსო ბაზარზე სესხებზე რეგულაციები დააწესა:

„ჩვენ დავამკვიდრეთ სამართლიანი თამაშის წესები. ეს იყო სწორი ნაბიჯი,დაკორექტირება ამ პოლიტიკის. ამან გამოიღო კონკრეტული შედეგი და რეიტინგებში წინ წავიწიეთ. ჩვენი პოლიტიკა მიმართულია, რომ მივაღწიოთ ლარში სესხების კიდევ უფრო გაიაფებას. ეკონომიკა არის ცოცხალი სხეული და მასში წარმოდგენილია რამოდენიმე სექტორი. თუ ციფრები მოგვცემს სურათს, რომ რეგულაციები სექტორის განვითარებას აფერხებს თუ პრობლემები შეიქმნა პროფესიონალები მუშაობენ და საკითხი გადაწყდება“- განაცხადა მამუკა ბახტაძემ.  

პრემიერის განმარტებით, რეგულაციების შემოღება ეკონომიკისთვის იყო სწორი ნაბიჯი: „პასუხისმგებლიანი დაკრედიტების სისტემა არის გარანტი რომ მოქალაქეები დაცულები იქნებიან. ეს გენერალური ხაზი არ გადაიხედება“- განაცხადა მამუკა ბახტაძემ.