რა მეთოდებს მიმართავენ მძღოლები ავტომობილის ტექინსპექტირების გასავლელად

არასამთავრობო ორგანიზაციამ „საქართველოს ალიანსი უსაფრთხო გზებისთვის“ ჩაატარა კვლევა, რომელიც ადასტურებს, რომ ავტომობილის მფლობელები ტექინსპექტირების გავლის მიზნით, სხვადასხვა მეთოდს მიმართავენ.

ყველაზე აპრობირებული კი, ავტომანქანის ნაწილების ბაზრობაზე ან სოციალური ქსელის დახმარებით დაქირავებაა.

ნაწილების დამქირავებლები ბაზრობას მაშინ მიაკითხავენ, როცა მანქანას ხარვეზი აქვს, ხოლო ავტომობილის მფლობელს არასაკმარისი ბიუჯეტი საჭირო ნაწილის შესაძენად. 

თბილისში ერთ-ერთი ბაზრობის ავტომობილების ნაწილებით მოვაჭრეები აცხადებენ, რომ მათთან ნაწილის სათხოვნელად მძღოლები ხშირად მიდიან, თუმცა ისინი გარიგებაში არ შედიან, რადგან მათ საგადასახადო შემოსავლების სამსახური ამოწმებთ. 

ტექინსპექტირების ცენტრებში აცხადებენ, რომ შემოწმების პროცესში შეუძლებელია იმის დადგენა ნათხოვარი აქვს თუ არა მძღოლს მანქანის ნაწილი. სპეციალისტები გამოსავალს კანონის გამკაცრებაში ხედავენ. 

„თუ ეს პრობლემები არ მოგვარდა, ნდობა მოსახლეობაში და კმაყოფილება ამ რეფორმის მიმართ გაქრება და გაჩნდება ეჭვი რამდენად გვჭირდება ეს რეფორმა“ - ამბობს არასამთავრობო ორგანიზაცია „საქართველოს ალიანსი უსაფრთხო გზებისთვის“ წარმომადგენელი ნოდარ ტანგიაშვილი. 

ავტოსატრანსპორტო საშუალებების სავალდებულო ტექნიკური ინსპექტირება 2018 წლის 1 იანვრიდან დაიწყო და ეტაპობრივად მიმდინარეობს.

გაუმართავი ავტომობილის შემთხვევაში ფიზიკური პირისთვის ჯარიმა 50 ლარი, იურიდიულისთვის კი 200 ლარია. საქართველოს მასშტაბით, ინსპექტირების 89 ხაზია, მათ შორის 29 თბილისში. დეტალური ინფორმაციისთვის  ცხელი ხაზი მუშაობს.