ბექაური: მთლიანი სატელევიზიო სარეკლამო ბაზარი ის თანხაა, რასაც რეკლამის დამკვეთები ხარჯავენ და არა ის, რაც მაუწყებლებში მიდის

კომუნიკაციების ეროვნული კომისიის თავმჯდომარე განმარტავს, რომ სარეკლამო ბაზრიდან მაუწყებლებში შესული თანხა და მთლიანი სატელევიზიო სარეკლამო თანხა განსხვავებულია. ამის შესახებ კახა ბექაურმა Forbes-ის ქართულენოვან  გამოცემასთან ინტერვიუში განაცხადა.

„როდესაც ვლაპარაკობთ სარეკლამო ბაზარზე, შეთანხმებული უნდა ვიყოთ სინამდვილეში რაზე ვლაპარაკობთ, რომ იცოდეს მაყურებელმა და ყველამ რას ვითვლით და როგორ. ტელევიზიებში შესული სარეკლამო შემოსავლები, რომელიც კომისიის ანალიტიკურ პორტალზე ქვეყნდება ყოველ კვარტალურად, არის ის შემოსავლები, რომელიც სარეკლამო ბაზრიდან მიიღეს ტელევიზიებმა,  მაგრამ ამას მთლიანობაში ჩვენ ვერ დავარქმევთ სატელევიზიო სარეკლამო ბაზარს, რადგან მთლიანი სარეკლამო ბაზარი არის ის თანხა, რასაც რეკლამის მიმცემები ხარჯავენ სატელევიზიო რეკლამისთვის და ამ დარგში დასაქმებულმა ანალიტიკოსებმაც, მედიის წარმომადგენლებმაც ძალიან კარგად იციან, რომ როდესაც კონკრეტულმა კომპანიამ სატელევიზიო რეკლამისთვის ფული გასცა, სანამ ტელევიზიამდე მივიდა ეს თანხა, მან რამდენიმე ეტაპი გაიარა. 

პირველი - სარეკლამო სააგენტო, რომელმაც მას მედია გეგმა შეუდგინა და სარეკლამო მომსახურება გაუწია, და მეორე - ე.წ. მედია სახლები, რომლებიც ხან ერთი, ხან რამდენიმე ტელევიზიის რეკლამას ყიდიან. ამიტომ, ნაწილი სარეკლამო ბაზრისა, სანამ ტელევიზიებამდე მივა, სარეკლამო ფული რჩება გარეთ, რომელიც არ არის ასახული იმ მონაცემებში, რასაც კომისია აქვეყნებს.  სხვადასხვა წელს, იმის მიხედვით, როგორ ურთიერთობას ალაგებენ კომპანიები დამკვეთთან და მაუწყებლებთან, იცვლება სტრუქტურა და შესაბამისად შემოსავლები.

მათ შორის, ეს იყო ერთ-ერთი მიზეზი, როდესაც ჩვენ 2015-2017 წლების სარეკლამო ბაზრის კვლევა გავაკეთეთ, სულ იყო აპელირება ამ თემაზე, ამბობდნენ, რომ კომისიის მიერ დადგენილმა რეგულაციებმა გამოიწვია სარეკლამო ბაზრის ვარდნა, სარეკლამო ბაზარს ეძახდნენ მხოლოდ იმ ფულს, რომელიც ტელევიზიებში შედიოდა და რასაც ჩვენ ავსახავდით ანალიტიკურ პორტალზე. ამ კვლევის ჩატარების მაპროვოცირებელი სწორედ ეს იყო და მეორე საკითხი, ზუსტად 2017 წელს შეცვალეს ბიზნესმოდელი სარეკლამო ბაზარზე ორმა მსხვილმა ტელევიზიამ, რომელიც ბაზარზე 80%-ს ფლობდა, მათ 2017 წელს დაიწყეს ერთად რეკლამის გაყიდვა, რამაც განაპირობა შემოსავლების გადანაწილება სხვანაირად და ეს დეტალურად არის ჩვენს ანალიზში“, - განაცხადა კომუნიკაციების ეროვნული კომისიის თავმჯდომარემ.