ქვიშხეთის სარკინიგზო გვირაბის მშენებლობაზე დასაქმებული მუშები გაიფიცნენ

ხაშურის მუნიციპალიტეტში, ქვიშხეთის სარკინიგზო გვირაბის მშენებლობაზე დასაქმებული მუშები გაიფიცნენ. რკინიგზელთა ახალი პროფკავშირის ინფორმაციით, „ჩინეთის რკინიგზის 23-ე ბიუროს“ 60 თანამშრომელი საპროტესტო აქციას მართავს. დასაქმებულები უსაფრთხოების ნორმების დაცვას, შვებულებასა და შესაბამის ანაზღაურებას ითხოვენ.

კერძოდ, გაფიცულები ითხოვენ, რომ რკინიგზის დეპარტამენტის კონტრაქტორმა კომპანიამ, შპს „ჩინეთის რკინიგზის 23-ე ბიუროს ჯგუფმა“ დღიური ხელფასი, რომელიც ახლა 20 ლარს შეადგენს, თითოეულ მუშას 10 ლარით გაუზარდოს და საქართველოს შრომის კოდექსით გათვალისწინებული ნორმები დაიცვას.

მუშები უსაფრთხოების წესების დაცვის პრობლემაზე და მძიმე სამუშაო პირობებზე საუბრობენ. გაფიცულები ამბობენ, რომ თუ ჩინური კომპანია მათ მოთხოვნებს არ დააკმაყოფილებს, ისინი გვირაბს გადაკეტავენ და სამუშაოების გაგრძელების საუშუალებას არ მისცემენ იმ მუშებს, რომლებიც კომპანიას ჩინეთიდან ჰყავს ჩამოყვანილი.

რკინიგზელთა ახალი პროფკავშირის წარმომადგენელი პასუხისმგებლობას რკინიგზის დეპარტამენტს აკისრებს და დამსაქმებელს მოთხოვნების დაკმაყოფილებისკენ მოუწოდებს.

მსგავსი მოთხოვნები მშენებლობაზე დასაქმებულ მუშებს 2013 წელსაც ჰქონდათ, თუმცა, მათი პროტესტი მაშინაც უშედეგო აღმოჩნდა.

მოგვიანებით, დამსაქმებელმა კომპანიამ განცხადება გაავრცელა, სადაც აღნიშულია, რომ გაფიცულებს კომპანიისთვის წერილობით არ მიუმართავთ.

„შპს ”ჩინეთის რკინიგზის 23-ე ბიუროს ჯგუფი“-ს მუდმივმოქმედი ფილიალის დასაქმებულები 2019 წლის 3 აგვისტოდან უარს აცხადებენ ნაკისრი ვალდებულებების შესრულებაზე და არ გამოდიან სამუშაოზე. დასაქმებულები განმარტავენ, რომ არიან გაფიცულები, თუმცა აღნიშნულთან დაკავშირებით მათ კომპანიისთვის წერილობით არ მოუმართავთ და არ განუხორციელებიათ საქართველოს კანონმდებლობით დადგენილი პროცედურები.

კომპანია გამოთქვამს მზადყოფნას დააკმაყოფილოს ყველა კანონიერი მოთხოვნა, რაც გამომდინარეობს საქართველოს შრომის კანონმდებლობიდან, მათ შორის შვებულებასთან და განაცდური დღეების ანაზღაურებასთან დაკავშირებით. ხოლო ხელფასის მომატებასთან დაკავშირებით დასაქმებულებს შევთავაზეთ რამდენიმე ვერსია სახელფასო სისტემის დაანგარიშებისათვის.

მიუხედავად მრავალმხრივი მცდელობისა მოლაპარაკებები უშედეგოდ დასრულდა. ამჟამად მოქმედი შრომითი ხელშეკრულების თანახმად, დასაქმებულების მიმართ გათვალისწინებულია როგორც ძირითადი ხელფასი, ისე დანამატი და ზეგანაკვეთური სამუშაოსათვის განკუთვნილი დამატებითი ანაზღაურება. რაც საერთო ჯამში ბევრად აღემატება დასაქმებულთა მიერ გავრცელებულ ინფორმაციას მათი დღიური ანაზღაურების - 20 ლარით განსაზღვრასთან დაკავშირებით“, - აღნიშნულია განცხადებაში.