პროფკავშირები „საქართველოს რკინიგზასთან“ მოლაპარაკებას იწყებს

„რკინიგზელთა ახალ პროფკავშირები“ გაფიცვის გადაწყვეტილებას ძალაში ტოვებს, თუმცა „საქართველოს რკინიგზასთან“ მოლაპარაკების ფორმატზე გადადის. მხარეები კომპანიის თანამშრომლების ხელფასების მომატების საკითხს განიხილავენ.

ინფორმაცია მედიას პრესკონფერენციაზე ორგანიზაციის თავმჯდომარე ვიტალი გიორგაძემ მიაწოდა:  

„საქართველოს რკინიგზელთა ახალი პროფესიული კავშირი“ თვეზე მეტია „საქართველოს რკინიგზასთან" შრომით დავას აწარმოებს და შრომითი დავის საკითხი გახლავთ იმ რკინიგზელებისთვის 50%-ანი ხელფასის მომატება, რომელთა ანაზღაურებაც 1000 ლარს არ აღემატება. რკინიგზამ საწყის ეტაპზე უარი განაცხადა მოლაპარაკებებზე და ჩვენ პროფკავშირები, იძულებულნი გავხდით, უფრო რადიკალური გზისთვის, გაფიცვისთვის, მიგვემართა.

გვინდა პოზიტიურად შევაფასოთ "საქართველოს რკინიგზის" გუშინდელი ნაბიჯი, სადაც ისინი მზადყოფნას აცხადებენ ჩვენთან მოლაპარაკების დასაწყებად. სწორედ ამ საკითხზე დღეს ჩვენი ორგანიზაციის გამგეობის სხდომა შედგა და გამგეობამ დაადგინა, რომ „საქართველოს რკინიგზელთა ახალი პროფკავშირები“ ამ ეტაპზე გაფიცვის კონკრეტულ თარიღს არ დაასახელებს, გამომდინარე იქიდან, რომ გვსურს მოლაპარაკებები ზედმეტი სტრესებისა და ულტიმატუმების გარეშე წარიმართოს. ჩვენ ვიმედოვნებთ, რომ თუ „საქართველოს რკინიგზის“ ადმინისტრაციის მხრიდან კეთილგონივრულად იქნება წარმართული მოლაპარაკებები, თავიდან ავირიდებთ გაფიცვას. კიდევ ერთხელ ხაზი მინდა გავუსვა იმას, რომ გაფიცვა გახლავთ უკიდურესი გზა ადამიანებისა, რომ საკუთარი უფლებები დაიცვან", - განაცხადა რკინიგზელთა ახალი პროფკავშირების თავმჯდომარემ, ვიტალი გიორგაძემ.

კომპანია „საქარველოს რკინიგზის“ თანამშრომლებმა მოსალოდნელი გაფიცვის შესახებ 2019 წლის 5 აგვისტოს განაცხადეს. 4 800 ადამიანს უკვე ხელი აქვს მოწერილი გაფიცვაზე. ისინი ხელფასის 50%-იან ზრდას ითხოვენ. 

მოგვიანებით, სს „საქართველოს რკინიგზის“ მენეჯმენტი თანამშრომლების მიერ დაგეგმილ გაფიცვას და ხელფასების ზრდის მოთხოვნას სპეციალური განცხადებით გამოეხმაურა. კომპანიამ ხელფასების 50%-იანი მატების მოთხოვნას პოპულისტური უწოდა.