ექსპერტები და პოლიტიკოსები ეროვნულ ბანკს 50-მილიონიანი ოფისის მშენებლობის გამო აკრიტიკებენ

რამდენიმე დღის წინ ცნობილი გახდა, რომ საქართველოს ეროვნული ბანკი, რომელიც დღეს იუსტიციის სახლშია განთავსებული, ცირკის მიმდებარე ტერიტორიაზე ახალი ოფისის აშენებას გეგმავს, რაზეც 50 მილიონი ლარი უნდა დაიხარჯოს. ეკონომკური სირთულეებისა და ლარის კურსის ისტორიული გაუფასურების ფონზე სებ-ის გადაწყვეტილებას საზოგადოების დიდი ნაწილის კრიტიკა მოჰყვა. ეროვნული ბანკის პრეზიდენტის, კობა გვენეტაძისადმი ბოლოდროინდელი პრეტენზიების გრძელ სიას ახალი ოფისის მიზანშეუწონლობის თემაც დაემატა. საზოგადოების კრიტიკის ფონზე სებ-მა განცხადება გაავრცელა და ეს ნაბიჯი ეროვნულ ბანკში დასაქმებულთა რაოდენობის და ბანკის ფუნქციების ზრდის აუცილებლობით ახსნა.

კობა გვენეტაძის არგუმენტებს სპეციალისტების და პოლიტიკოსების უმრავლესობა არ იზიარებს.

„ეს ინსტიტუტი საქართველოს ზოგადად არ სჭირდება და შესაბამისად, არც მისი დანახარჯები მისი უფრო მაღალი ხარისხის კომფორტის მოსაწყობად. თანდათან ამ ორგანიზაციის კომერციალიზაცია შეიძლება მოხდეს, ხოლო ის ფუნქცია, რომელიც რეგულირებას და ფულის მასის კონტროლს ეხება, უბრალოდ უნდა გაუქმდეს. რეფორმა სულ სხვა მიმართულებით უნდა განვითარდეს - არა ამ ორგანიზაციის კომფორტის მოწყობისკენ, არამედ მისი გაუქმებისკენ და იმ სავალალო შედეგების თავიდან აცილებისკენ, რომელიც მის ფუნქციონირებას ზოგადად თან ახლავს“, - აცხადებს „ახალი ეკონომიკური სკოლის“ პრეზიდენტი პაატა შეშელიძემ.

ეკონომისტი აკაკი ცომაია ამბობს, რომ ეროვნული ბანკის მიერ ახალი შენობის მშენებლობაზე გამოყოფილი 50 მილიონი ბიუჯეტს არ დააწვება, მაგრამ მოსახლეობის ჯიბეზე ნეგატიურად აისახება.

„საქართველოს ეროვნულ ბანკს აქვს თავისი შემოსავალი მონატერული პოლიტიკის სახით. შესაბამისად, თუ სები ახალ შენობაზე 50 მილიონს დახარჯავს, ეს გადასახადების გადამხდელებს ტვირთად არ დააწვება. თუმცა, ამავდროულად, 50 მილიონით გაიზრდება ფულის მიმოქცევა, რაც ინფლაციურ მოლოდინებს გააჩენს. ეს კი გარკვეულწილად მოსახლეობის ჯიბეზე აისახება“, - აცხადებს ცომაია.

სებ-ის გადაწყვეტილებას უპირობოდ იწონებს PMCG-ის ეკონომისტი მიხეილ კუკავა. მისი თქმით, „ეროვნული ბანკი იმდენად გონივრულ მონეტარულ პოლიტიკას ეწევა - ეს არ არის მოლდოვის ან სომხეთის ეროვნული ბანკი, რომლებმაც საკუთარი რეზერვები გაანიავეს - რომ სებ-ს შეუძლია, თავს ამის უფლება მისცეს. თუ ეროვნული ბანკი ამბობს, რომ არსებული შენობა არ არის საკმარისი, ესე იგი ეს ნამდვილად ასეა. სხვა შემთხვევაში ის ამაზე ფულს არ დახარჯავდა“.

„ევროპული საქართველოს“ ერთ-ერთი ლიდერის, დეპუტატ ხათუნა გოგორიშვილის თქმით, კობა გვენეტაძე რეალობას არის მოწყვეტილი და მისგან ყველაფერია მოსალოდნელი.

„კობა გვენეტაძისგან ასეთი გადაწყვეტილების მიღება გასაკვირი არაა. როდესაც პარლამენტში იყო მოსული და შეკითხვებზე გვპასუხობდა, მან თქვა, რომ ცხოვრებაში არასდროს ჰქონია კრედიტი და ვერ წარმოუდგენია, რომ ადამიანს შეიძლება 500- ან 1000-ლარიანი კრედიტი სჭირდებოდეს. ის არარეალურ საქართველოში ცხოვრობს და მთლიანად მოწყვეტილია რეალობას. შესაბამისად, როდესაც ადამიანი ასე ფიქრობს, არ არის გასაკვირი, რომ  შექმნილ სიტუაციაში საკუთარი ოფისის მოწყობისთვის და სამუშაო პირობების გაუმჯობესებისთვის 50 მილიონი ლარი დახარჯოს“, - აცხადებს გოგორიშვილი.

უმრავლესობის ყოფილი წევრი და პარტია „სახალხო ტრიბუნის“ ხელმძღვანელი დავით ჭიჭინაძე ამბობს, რომ „საოფისე შენობებისთვის ასეთი დიდი თანხების დახარჯვა ჩვენნაირი გაჭირვებული ქვეყნებისთვის არ არის მიზანშეწონილი, განსაკუთრებით მაშინ, როდესაც ეს ბანკირებს ეხება. ყველა ხედავს, რა ხდება წლების განმავლობაში ჩვენი ქვეყნის საბანკო სისტემაში. აქედან გამომდინარე, ეროვნული ბანკი არის მთავარი რეგულატორი და უფრო იმით უნდა იყოს დაკავებული, რომ მკაცრი რეგულაციები შემოიღოს ბანკებთან მიმართებით, ვიდრე საკუთარი სამუშაო პირობების გაუმჯობესებაზე ფიქრობდეს. ასეთ მძიმე მდგომარეობაში, როდესაც ლარის კურსზე ქვეყანაში პასუხი არავის გააჩნია, ჩემი აზრით, ეს ადამიანები ახალ ოფისს კი არა, ძველი ოფისიდან არიან გამოსაყრელები“, - აღნიშნა დავით ჭიჭინაძემ.

ნაციონალური მოძრაობის წევრის და ეროვნული ბანკის ყოფილი პრეზიდენტის, რომან გოცირიძის თქმით, სებ-ის მიერ ახალი ოფისის მშენებლობა „არ არის გამართლებული, ვინაიდან საქართველო მთელ მსოფლიოში ერთ-ერთ მოწინავე ადგილს იკავებს უსაქმური ჩინოვნიკების რაოდენობით. სამინისტროების რიცხვის შემცირებით ფულის დაზოგვა არ მომხდარა. იუსტიციის სახლის შენობაში განთავსებულია ენერგეტიკის სამინისტრო, რომელიც ეკონომიკის სამინისტროს შეუერთდა. თუ ეროვნულ ბანკს უფრო დიდი ფართი სჭირდება, დაიკავოს ენერგეტიკის სამინისტროს ყოფილი ფართი. ამ პრობლემის მოგვარება ძალიან მარტივად შეიძლება“, - აცხადებს დეპუტატი.

Imedinews-ი მმართველი გუნდის დეპუტატებთან დაკავშირებასაც შეეცადა. პარლამენტის საფინანსო-საბიუჯეტო კომიტეტის ხელმძღვანელი ირაკლი კოვზანაძე ბელარუსშია, პრემიერმინისტრის ვიზიტის ფარგლებში და მას ჯერჯერობით ვერ ვუკავშირდებით. მის შეფასებას მოგვიანებით შემოგთავაზებთ.