პროგნოზი: წლის ბოლომდე ინფლაცია შესაძლოა 7%-ით განისაზღვროს

აშშ დოლარი მსოფლიოს ძირითად ვალუტებთან მიმართებაში მცირედით გამყარდა და თავის ისტორიულ მაქსიმუმს მიაღწია. თუმცა, დოლარის გამყარება ლარის სადღეისოდ არსებული სისუსტის მხოლოდ მცირე ნაწილის ამხსნელი ფაქტორია, წერს Forebs-ის ქართული გამოცემა „თიბისის“ სექტემბრის მაკროეკონომიკურ მიმოხილვაზე დაყრდნობით. 

„ლარის ეფექტური გაცვლითი კურსის ინფლაციაზე ზეწოლის გათვალისწინებით, ეროვნულმა ბანკმა მონეტარული პოლიტიკა გაამკაცრა. კერძოდ, რეფინანსირების განაკვეთის ზრდის გარდა, ასევე გაცხადდა, რომ ინფლაციის მოთოკვისათვის სხვა ნაბიჯებიც გადაიდგმებოდა. თიბისი კვლევების შეფასებით, თუ ლარის ეფექტური კურსი არ გამყარდა, წლის ბოლომდე ინფლაცია დაახლოებით 7%-ით განისაზღვრება.

მონეტარული პოლიტიკის გამკაცრება, განსაკუთრებით საპროცენტო განაკვეთების შემდგომი აწევისა და სხვა ინსტრუმენტების გამოყენების შემთხვევაში, შიდა მოთხოვნაზე და ეკონომიკის ზრდაზე უარყოფითად იმოქმედებს. ამასთან, თიბისი კვლევების შეფასებით, იმ შემთხვევაში თუ ამას სასურველი შედეგი-ლარის ეფექტური და ასევე აშშ დოლარის მიმართ გაცვლითი კურსის გამყარება მოჰყვა, ჯამურად ეკონომიკის ზრდაზე უარყოფითი ეფექტი მნიშვნელოვანი არ უნდა იყოს. ეს გამოწვეულია იმ გარემოებით, რომ მართალია პოლიტიკის გამკაცრება შიდა მოთხოვნაზე უარყოფითად იმოქმედებს, თუმცა ლარის აშშ დოლარის მიმართ გამყარებას საპირისპირო ეფექტი ექნება, რაც ბიზნესისა და სამომხმარებლო განწყობების რამდენადმე მაინც გაუმჯობესების შედეგი იქნება, - ნათქვამია კვლევაში.

4 სექტემბერს ეროვნული ბანკის პრეზიდენტმა კობა გვენეტაძემ ინფლაციის ზრდა აღიარა და განაცხადა, რომ აგვისტოში წლიურმა ინფლაციამ (ფასების ზრდამ) 4.9 პროცენტი შეადგინა, რაც მიზნობრივ მაჩვენებელს (3%-ს) 1.6 პროცენტული პუნქტით აჭარბებს.

2 სექტემბერს ეროვნული ვალუტა აშშ დოლართან მიმართებით თითქმის 2 თეთრით გაუფასურდა - 1 აშშ დოლარის ღირებულებამ 2.9614 ლარი შეადგინა, კომერციულ ბანკებში კი 1 დოლარი 3 ლარად ივაჭრებოდა. ეს უკვე მეორე შემთხვევა იყო, როდესაც დოლარი სამ ლარად იყიდებოდა, პირველი შემთხვევა 2019 წლის ივლისში დაფიქსირდა, როდესაც ლარი ისტორიულ მაჩვენებლამდე გაუფასურდა და ერთი დოლარის ფასი 3 ლარი გახდა.