კობა გვენეტაძე: ვმუშაობთ საბანკო რეგულაციების გამარტივებაზე

ეროვნული ბანკის პრეზიდენტის კობა გვენეტაძის განცხადებით, 2019 წლის დასაწყისში ამოქმედებული ახალი რეგულაციების, ძირითადი მიზნები მიღწეულია და ეროვნული ბანკი უშვებს შესაძლებლობას რომ რეგულაციების წესები გადაიხედოს და იყოს უფრო გამარტივებული. ამის შესახებ ეროვნული ბანკის პრეზიდენტმა კონრად ადენაუერის ფონდისა და ეკონომიკური პოლიტიკის კვლევის ცენტრის მიერ ორგანიზებულ დისკუსიაზე ჟურნალისტებთან განაცხადა. მის კომენტარს „ტაბულა“ ავრცელებს. 

„ჩვენ ყოველთვის ვუშვებთ იმის შესაძლებლობას, რომ მოხდეს რეგულაციების გადახედვა, ჩვენ თავიდანვე განვაცხადეთ, რომ პროცესი ამგვარად წარიმართებოდა ვმუშაობთ იმაზე, რომ უფრო გამარტივდეს რეგულაციები და იყოს უფრო მეტად გასაგები. ასევე ვმუშაობთ, რომ თუ კი არსებობს ამ ნაწილში რაიმე ბიუროკრატიული ტვირთი მის ჩამოშორებაზე“, - განაცხადა კობა გვენეტაძემ.

გვენეტაძის თქმით, დაახლოებით 9 თვეა გასული ახალი საბანკო რეგულაციების ამოქმედებიდან და „ის ძირითადი მიზნები რის მიღწევასაც ვფიქრობდით მიღწეულია. ჩვენ ვხედავთ, ამ სფეროში პორტფელის გაჯანსაღებას, ანუ, სესხები გაიცემა უფრო კარგი მაჩვენებლებით და უფრო კარგი სტანდარტებით“, - თქვა გვენეტაძემ.

საბანკო რეგულაციების გადახედვასთან დაკავშირებით კომენტარი თბილისის მერმა და „ქართული ოცნების“ გენერალურმა მდივანმა კახა კალაძემ ივნისში გააკეთა. მაშინ კალაძემ თქვა, რომ ხელისუფლებას საბანკო რეგულაციების გადახედვა მოუწევს.

ფიზიკურ პირებზე სესხების გაცემის დებულება 2019 წლის პირველი იანვრიდან ამოქმედდა.

2018 წლის გაზაფხულზე ხელისუფლებამ წამოჭრა ჭარბვალიანობის პრობლემა, რომლის პოლიტიკური დივიდენდებიც, სპეციალისტების აზრით, ახალარჩეული პრემიერმინისტრის, მამუკა ბახტაძის კარიერას და საპრეზიდენტო არჩევნების მეორე ტურს მოხმარდა: პირველმა გადაწყვეტილებამ მომავალში მაღალრისკიანი დაკრედიტება შეზღუდა, რომელიც ბოლო რამდენიმე წლის განმავლობაში ონლაინ პლატფორმების და მოგვიანებით ამ სექტორში ბანკების ჩართულობით განვითარდა; მეორე გადაწყვეტილებას ერთგვარი სოციალური ეფექტი ჰქონდა და განმუხტა დაძაბულობა, რასაც იწვევდა მოსახლეობის მნიშვნელოვანი ნაწილის უკმაყოფილება პრობლემურ სესხებთან დაკავშირებული ვალის დაბრუნების სამართლებრივი პროცესებით.

მიუხედავად იმისა, რომ ორივე გადაწყვეტილებამ გაცხადებულ მიზნებსა და სასურველ შედეგს სრულად მიაღწია, ეროვნულმა ბანკმა „ჭარბვალიანობასთან“ ბრძოლაში თავისი წვლილი შეიტანა და საქართველოში მოქმედ ფინანსურ ორგანიზაციებს „პასუხისმგებლიანი დაკრედიტების” რეგულაციები დაუწესა, რომლებმაც სპეციალისტების თქმით, ეკონომიკის სხვადასხვა სექტორის გამართული და საკმარისი დაკრედიტება შეუძლებელი გახადა - დაზიანდა სამშენებლო და უძრავი ქონების სექტორი; მკვეთრად დაეცა საყოფაცხოვრებო ტექნიკის და მობილური ტელეფონების გაყიდვები; საკრედიტო რესურსებთან წვდომა გაურთულდა ქვეყნის ათიათასობით თვითდასაქმებულ მოქალაქეს.

ეროვნული ბანკის პრეზიდენტის მხრიდან რეგულაციების გადახედვის სურვილს სპეციალისტების ნაწილი პრემიერმინისტრ მამუკა ბახტაძის თანამდებობიდან წასვლას და ახალი პრემიერიმინსტრის არჩევას უკავშირებენ.

მას შემდეგ რაც ივლისის ბოლოს ლარის კურსი ისტორიულ მაჩვენებლამდე გაუფასურდა (1 დოლარის ფასი 3 ლარი გახდა) კობა გვენეტაძის გადადგომის მოთხოვნით „ფეისბუკზე“ აქტიური კამპანია გაჩაღდა. ეროვნული ბანკის პრეზიდენტის მიმართ არსებული პრეტენზიებიდან ერთ-ერთი - არასწორი და ეკონომიკისთვის დამაზიანებელი საბანკო რეგულაციების შემოღებაა.