Google-ი ახალ Pixel 4-ს ინდოეთში არ გაყიდის

Google-ი ახალ Pixel 4-ს ინდოეთში არ გაყიდის, ამ ქვეყნის ბაზარი კი სმარტფონების გაყიდვის მხრივ სიდიდით მეორეა. ამის შესახებ ინფორმაციას CNN-ი ავრცელებს.

ახალი სმარტფონები Google-მა ნიუ-იორკში 16 ოქტომბერს წარადგინა, ოფიციალურად კი 24 ოქტომბრიდან გაიყიდება. 

ინდოეთში ახალი მობილურის შეტანაზე უარის თქმის მიზეზი, სავარაუდოდ, Pixel 4-ს ერთ-ერთი მთავარი მახასიათებელი გახდა. საუბარია სახის ამომცნობ და ადამიანის ჟესტების კონტროლ სისტემაზე. ეს ფუნქცია მოქმედებს 60 გიგაჰერც სიხშირეზე, რომლის გამოყენების უფლებასაც ინდოეთი კომპანიებს არ აძლევს. 

ინდოეთის ტელეკომუნიკაციების დეპარტამენტს ამასთან დაკავშირებით კომენტარი ჯერ არ გაუკეთებია. 

ახალი მობილურის პრეზენტაციაზე ცნობილი გახდა, რომ Pixel 4-ს თითის ანაბეჭდის სენსორის ნაცვლად, ამ მოდელის მობილურებში სახის ამოცნობის სისტემა ექნება. ტელეფონს ბლოკირებული ეკრანი ფაქტობრივად არ აქვს: როგორც კი მობილურს მომხმარებელი ხელში აიღებს, ის სახის ამოცნობას იწყებს და უშვებს იმ აპლიკაციას, რომელიც ეკრანის დაბლოკვამდე იყო ჩართული. 

ასევე ახალ Pixel-ებში ნამდვილი პატარა რადარებია. ტექნოლოგია, რომელსაც Google-მა Motion Sense-ი უწოდა, ცნობს და შიფრავს ჟესტებს, რომლითაც მაგალითად შეგიძლიათ გამორთოთ მაღვიძარა ან დაუწიოთ მუსიკის ხმას. თუმცა ეს ყველაფერი არ არის. ჩიპის დახმარებით ტელეფონი "ხედავს" როდესაც მისი მფლობელი ახლოს არის. თუ ახლოს არავინ არის, ეკრანი გამორთულია, მიახლობას კი მობილური "ამჩნევს" და სწრაფადვე ააქტიურებს სახით განბლოკვის ფუნქციას.