სები: „პროგრეს ბანკთან“ დაკავშირებული მედიაში გავრცელებული დოკუმენტი ეროვნულ ბანკს არ აქვს

მედიაში დღეს გავრცელებული აუდიტორული კომპანია „დელოიტის“ წერილი ეხება „თიბისი ბანკის“ მიერ „პროგრეს ბანკის“ აქტივებისა და ვალდებულებების შეძენასთან დაკავშირებული გარიგების მომენტში ხელმომწერი პირის უფლებამოსილების საკითხს. ამ განცხადებას ეროვნული ბანკი ავრცელებს და აღნიშნავს, რომ წერილს არანაირი კავშირი აქვს „პროგრეს ბანკის“ გადარიცხვებთან დაკავშირებულ რაიმე დასკვნასთან.

„კიდევ ერთხელ ვაცხადებთ, რომ მედიაში გავრცელებული ე.წ. დოკუმენტი, რომელიც ვითომდა ფულის გათეთრების თემას უკავშირდება, საქართველოს ეროვნული ბანკს არ აქვს. ჩვენ მივმართეთ „თიბისი ბანკს“, თუკი მათთან არსებობდა მსგავსი დოკუმენტი, დაუყოვნებლივ გადაეცათ პროკურატურისათვის და მოეწოდებინათ ეროვნული ბანკისთვის. თუმცა, „თიბისი ბანკმა“ დაადასტურა, რომ მედიაში გავრცელებული შინაარსის მქონე აუდიტორული დასკვნა „თიბისი ბანკს“ არ მიუღია და, შესაბამისად, არც გააჩნია.

ეროვნული ბანკისა და საფინანსო სისტემის მისამართით გამოთქმული მსგავსი უპასუხისმგებლო და მიზანმიმართულად არასწორი განცხადებები წარმოადგენს საფინანსო სისტემის დისკრედიტაციის მცდელობას და მნიშვნელოვნად აზიანებს ქვეყნის იმიჯს“, - აღნიშნულია განცხადებაში. 

„თიბისი ბანკის გენერალური დირექტორი უარყოფს საფინანასო ინსტიტუტის დამფუძნებლის მამუკა ხაზარაძის მიერ გავრცელებულ ინფორმაციას, რომელიც „პროგრესბანკში“ ფულის გათეთრებას ეხება. 

ვახტანგ ბუცხრიკიძე აცხადებს, რომ არ არსებობს საერთაშორისო აუდიტორული დასკვნა, რომელიც „პროგრესბანკში“ ფულის გათეთრებას დაადასტურებს, ან ამ მიმართულებით ეჭვს გააჩენს. 

ბუცხრიკიძისთვის უცნობია, რის საფუძველზე აკეთებს განცხადებას მამუკა ხაზარაძე. 

23 ოქტომბერს ეროვნული ბანკის პრეზიდენტმა კობა გვენეტაძემ განაცხადა, რომ „პროგრეს ბანკი“ დღესდღეობით აღარ არსებობს, ამიტომ მისი შემოწმება შეუძლებელია. ასე გვენეტაძემ „თიბისი ბანკისა“ და მოძრაობა „ლელოს“ დამფუძნებელს მამუკა ხაზარაძეს უპასუხა, რომელმაც გვენეტაძეს „პროგრეს ბანკის“ ტრანზაქციებით დაინტერესებისკენ მოუწოდა.

„მთავარ არხმა“ ჟურნალისტური გამოძიება ჩაატარა, რომლის თანახმად, „პროგრეს ბანკში“ აუდიტორული შემოწმება უცხოელმა ექსპერტებმა 2016 წელს ჩაატარეს. შემოწმების დროს სპეციალისტებმა დაადგინეს, რომ ბანკის ათობით გადარიცხვა ფულის გათეთრების ნიშნებს შეიცავდა. 

საქართველოს ეროვნულმა ბანკმა „პროგრეს ბანკს“ საბანკო საქმიანობის ლიცენზია 2016 წლის 18 ოქტომბერს გაუუქმა.