თბილისის მერიის ბიუჯეტის პროექტი მილიარდ 300 მილიონს შეადგენს

თბილისის მერის, კახა კალაძის განცხადებით, 2020 წლისთვის მერიის ბიუჯეტი გაიზრდება. კალაძის თქმით, შემდეგი წლის ბიუჯეტი და 2020 წლის განმავლობაში განსახორციელებელი მთლიანი პროექტების ჯამი დაახლოებით მილიარდ 300 მილიონს შეადგენს. ამასთან, კალაძე ამბობს, რომ თბილისის საკრებულოში უკვე დაიწყო საბიუჯეტო განხილვები, რაც ერთი თვის განმავლობაში გაგრძელდება. ამის შესახებ ცნობილი დედაქალაქის მთავრობის სხდომაზე გახდა. 

"მოგეხსენებათ, რომ ჩემი მერობის პერიოდში თბილისის ბიუჯეტი ყოველწლიურად იზრდება. თუ 2017 წელთან შედარებით 2018 წელს თბილისის ბიუჯეტი 920 მილიონს აღწევდა, 2019 წლის ბიუჯეტი მილიარდ 100 მილიონამდე დაიგეგმა, ხოლო 2020 წლის ბიუჯეტი და 2020 წლის განმავლობაში განსახორციელებელი მთლიანი პროექტების ჯამი დაახლოებით მილიარდ 300 მილიონს შეადგენს.

ჩვენს მიერ ინიცირებული ბიუჯეტი იქნება მილიარდ 20 მილიონი, რომელსაც დაემატება დაახლოებით 60-დან 80 მილიონამდე გარდამავალი ნაშთი. ამას დაემატება ასევე 200 ავტობუსისთვის განკუთვნილი ფინანსური რესურსი, დაახლოებით 65 მილიონი ევროს ოდენობით. ამ პროექტს მუნიციპალიტეტი ევროპის რეკონსტრუქციისა და განვითარების ბანკთან ერთად ახორციელებს. 

რაც შეეხება ინფრასტრუქტურულ პროექტებს, მოგახსენებთ, რომ აქტიურად განხორციელდება მარშალ გელოვანისა და მუხრან მაჭავარიანს დამაკავშირებელი სრულიად ახალი გზის მშენებლობა; ასევე წლის ბოლოსკენ დაიწყება უნივერსიტეტის მაღლივი კორპუსიდან წყნეთის გზატკეცილამდე დამაკავშირებელი გზის მშენებლობა; დასრულდება ჭავჭავაძის ქუჩის რეაბილიტაცია, ასევე, გლდანში დასრულდება ხიზანიშვილის და ვეკუას ქუჩების სრული რეაბილიტაცია; დასრულდება გუდიაშვილის მოედნის რეაბილიტაცია.

თქვენ ნახეთ, რამდენად ხარისხიანად შესრულდა ორბელიანის მოედანზე სამუშაოები. ასევე ორბელიანის მიმდებარედ რამდენიმე ქუჩის რეაბილიტაცია გვაქვს დაგეგმილი", - განაცხადა კალაძემ. კერძოდ, მისი თქმით, 2020 წლის განმავლობაში იგეგმება: წერეთლის, ვაჟა-ფშაველას და ქეთევან წამებულის გამზირების სრული რეაბილიტაცია, ისეთი მასშტაბებით როგორც ეს გაკეთდა ჭავჭავაძის გამზირზე.

"ზოგადად მინდა გითხრათ პარამეტრების დონეზე, რომ სოციალური და ჯანდაცვის მიმართულებით საბიუჯეტო ხარჯები იმავე დონეზე იქნება შენარჩუნებული. უფრო მეტიც: ის 2019 წელს 336 მილიონს შეადგენდა, მისი ოდენობა იქნება 338 მილიონი. ჩვენ არ ვაკლებთ ხარჯებს სოციალური და ჯანდაცვის მიმართულებით ჩვენი მოქალაქეების მომსახურებას. ინფრასტრუქტურული პროექტების თვალსაზრისით კი, ჩვენი მთლიანი ხარჯები, ავტობუსების ჩანაცვლების ჩათვლით, საგრძნობლად განსხვავდება წლევანდელი ხარჯებისგან", - განაცხადა კახა კალაძემ. 

თბილისის მერის თქმით, მნიშვნელოვანი რესურსი იქნება მობილიზებული რაიონების მასშტაბითაც, რაც ნიშნავს, რომ გამგეობების დაფინანსება გაიზრდება. კალაძის განცხადებით, ასევე გაიზრდება ბინათმშენებლობის ამხანაგობის დაფინანსება, დაახლოებით 15-16 მილიონი ლარით. 

კახა კალაძემ თბილისის ბიუჯეტთან დაკავშირებით დედაქალაქის საკრებულოს მხარდაჭერას სთხოვს.