გახარია: ზოგიერთი კოლეგის პოლიტიკური ხულიგნობის მიუხედავად, ჩვენ ეკონომიკური ზრდა 5,1% გვქონდა

სახელმწიფო ქონების ეროვნულმა სააგენტომ ადგილობრივ და საერთაშორისო ბიზნესისთვის 100 საპრივატიზებო საინვესტიციო შეთავაზების შესახებ დღეს პრეზენტაცია გამართა. საქართველოს პრემიერმინისტრ გიორგი გახარიას განცხადებით, ეს იქნება უპრეცედენტო შემთხვევა, როდესაც ერთდროულად 100 საპრივატიზებო ობიექტი გავა აუქციონებზე და დაახლოებით, 2 500 სამუშაო ადგილი შეიქმნება.

პროექტის პრეზენტაცია ეკონომიკის მინისტრმა ნათია თურნავამ გახსნა. მისი განცხადებით, პროექტი უპრეცედენტოა, რადგან 100 პარალელური აუქციონი საქართველოს პრივატიზაციის ისტორიაში არ გამართულა.

„აუქციონი უპრეცედენტოა თავისი სიმარტივით, რადგან გამოგვაქვს გასაყიდად, სრულიად მომზადებული ობიექტები, სადაც ყველა შეთანხმება გავლილია და მორგებულია განაშენიანების გეგმებზე და თან ერთვის ჩვენი რეკომენდაცია, თუ რა სახის ბიზნესი შეიძლება განვითარდეს ამა თუ იმ ადგილას. ეს პროექტი უპრეცედენტოა თავისი შედეგით. ეს არის ახალი 2500 სამუშაო ადგილის პერსპექტივა“, - განაცხადა ნათია თურნავამ.  

პრემიერმინისტრმა ეკონომიკის სამინისტროს სწრაფი და ეფექტური მუშაობისთვის მადლობა გადაუხადა. გიორგი გახარიას განცხადებით, ეს პროექტი ეფექტურია და გამოიწვევს სწრაფ ეკონომიკურ ზრდას. 

„ზოგიერთი კოლეგის პოლიტიკური ხულიგნობის მიუხედავად, ჩვენ გვქონდა ეკონომიკური ზრდა 10 თვის მასშტაბით 5,1%. რა თქმა უნდა ეს არ არის საკმარისი. ჩვენს ეკონომიკას სჭირდება უფრო სწრაფი ზრდა. სწორედ ამიტომ გადავდგით ჩვენ ეს ნაბიჯი და ყველა ის აქტივი, განსაკუთრებით, რომელიც სახელმწიფო საკუთრებაშია და არ არის ეკონომიკურ ბრუნვაში ჩართული, სწრაფად უნდა „გავაცოცხლოთ“, იმისთვის, რომ მივცეთ ბიზნესს საშუალება უფრო ძლიერად ოპერირებდეს. ჩვენი მნიშვნელოვანი მიზანია ძლიერი ბიზნესი, რომელიც ქმნის სამუშაო ადგილებს. ჩვენი ქვეყნის ეკონომიკური ზრდა სრულად არის დამოკიდებული კერძო სექტორზე. მთავრობას სრულად აქვს გააზრებული, რომ შეუქმნას კომფორტული გარემო, რათა ქართული ბიზნესი იყოს უფრო ძლიერი“, - განაცხადა გახარიამ.     

პროექტის პრეზენტაციას ასევე ესწრებიან მთავრობის წევრები და ბიზნესის წარმომადგენლები.