ნათია თურნავა: ტურიზმის სექტორთან შევთანხმდით, რომ ეს დროებითი გამოწვევა უახლოეს თვეებში გადაილახება

მთლიანად ხელისუფლებისთვის, ეკონომიკის სამინისტროსთვის ძალიან მნიშვნელოვანია, რომ ტურისტული ინდუსტრია კარგად გრძნობდეს თავს, რადგან დღეს ის არის ძალიან დიდი დამსაქმებელი და ჩვენი მშპ-ის 8%-ს ქმნის. უფრო მეტად მნიშვნელოვანია, რომ უამრავ ადამიანს ასაქმებს, განსაკუთრებით რეგიონებში, მცირე სასტუმროებში. აქედან გამომდინარე, ჩვენ ძალიან სერიოზულად ვიმსჯელებთ, თუ რით დავეხმაროთ ამ ინდუსტრიას, - ამის შესახებ ეკონომიკისა და მდგრადი განვითარების მინისტრმა ტურიზმის სექტორის წარმომადგენლებთან გამართული შეხვედრის შემდეგ განაცხადა.

როგორც ეკონომიკის სამინისტროში აცხადებენ, ნათია თურნავამ დღეს გამართულ შეხვედრაზე კორონავირუსის ფონზე არსებული გამოწვევებს და მათი დარეგულირების საკითხებზე ტურიზმის სექტორთან ერთად იმსჯელა. მინისტრის თქმით, ეს „იყო ძალიან კარგი, ძალიან საქმიანი, ძალიან გულახდილი და ზომიერი ოპტიმიზმით გამსჭვალული შეხვედრა“.

ამასთან ერთად, როგორც მან აღნიშნა, ორივე მხარე ჯერდება იმაზე, რომ ეს არის დროებითი გამოწვევა, რომელიც უახლოეს ორ, მაქსიმუმ სამ თვეში გადაილახება.

მინისტრის ინფორმაციით, შეხვედრაზე ისეთი საკითხები დაისვა, რომლებიც სერიოზულ მსჯელობას საჭიროებს, მათ შორის სხვა კერძო ბიზნესებთან.

„ზოგიერთი ისეთი საკითხი დაისვა, რომელიც არ მოიცავს მარტო ხელისუფლებას, არამედ სხვა კერძო ბიზნესებთან, მათ შორის ბანკებთან, ელექტროენერგიის მომწოდებელ კომპანიებთან მსჯელობას საჭიროებს. და აქ ჩვენ არ შეგვიძლია ამ საკითხებზე მხოლოდ სახელმწიფოს და ხელისუფლების შიგნით ვიმსჯელოთ. უნდა გავითვალისწინოთ იმ ინდუსტრიების ინტერესებიც და ამას გარკვეული დრო დასჭირდება, მაგრამ პირობა დავდეთ, რომ ეს იქნება ოპტიმალური დრო და გვექნება საკმაოდ სწრაფი გამოხმაურება, თუ რა შეგვიძლია ამ თვალსაზრისით“, - განაცხადა ნათია თურნავამ.

საზღვარზე საქართველოსა და უცხო ქვეყნის მოქალაქეებისთვის შეზღუდვები დაწესდა და იტალიასთან პირდაპირი ფრენები დროებით შეჩერდა.

ეპიდემიური რისკის მქონე ქვეყნებიდან ჩამოსული მგზავრებისთვის დღეიდან 14-დღიანი კარანტინი სავალდებულოა.

საქართველოში კორონავირუსის 5 ახალი შემთხვევა გამოვლინდა. ამ დროისთვის უკვე ჯამში 9 შემთხვევაა დადასტურებული. საქართველოს მთავრობის მიერ შექმნილ სპეციალური ვებგვერდის თანახმად, კარანტინის რეჟიმშია 162 ადამიანი, ხოლო სტაციონარში მეთვალყურეობის ქვეშ – 45.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე 29 თებერვალს, მეოთხე კი 5 მარტს დადასტურდა.

4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3220 ადამიანი ემსხვერპლა, 51,193 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.