ბრუნო ლე მერი: ევროკავშირს ეკონომიკის გადატვირთვის გეგმა სჭირდება

კორონავირუსის გავრცელებით გამოწვეული შედეგების გადასალახად ევროკავშირს ეკონომიკის გადატვირთვის გეგმა სჭირდება, - ამის შესახებ რადიოსადგურ France Inter-ის ეთერში საფრანგეთის ეკონომიკისა და ფინანსთა მინისტრმა, ბრუნო ლე მერმა განაცხადა.

„ევროპამ, რომელიც ამ კრიზისის წინაშე დგას, პასუხისმგებლობა უნდა გამოიჩინოს. ევროპისგან ძლიერ, სერიოზულ და კოორდინირებულ პასუხს მოველი შესაძლო ეკონომიკურ კრიზისზე, რომელიც ეპიდემიოლოგიურ კრიზისს შეიძლება მოჰყვეს“, - განაცხადა ბრუნო ლე მერმა.

საფრანგეთის ეკონომიკისა და ფინანსთა მინისტრმა აღნიშნა, რომ 16 მარტს ევროზონის ფინანსთა მინისტრების შეხვედრა გაიმართება.

„ჩვენ უნდა შევიმუშავოთ გადატვირთვის გეგმა. რიგ ზომებს წარვადგენ, რათა ეს გეგმა განვსაზღვროთ, რაც ეკონომიკის აღორძინებაში დაგვეხმარება“, - განაცხადა ფრანგმა მინისტრმა.

მისივე თქმით, „ფრანგმა მეწარმეებმა უკვე იგრძნეს კორონავირუსის გავრცელების შედეგები“.

„2020 წელს საფრანგეთის ეკონომიკის ზრდაზე კორონავირუსის გავრცელების გავლენა სერიოზული იქნება. საფრანგეთმა გაკვეთილი უნდა გამოიტანოს ამ სიტუაციიდან, კერძოდ რიგ სტრატეგიულ სექტორებში შეამციროს ჩინეთზე დამოკიდებულება“, - დასძინა მან.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.