ირაკლი როსტომაშვილი: დეველოპერული სექტორის მხარდაჭერის ანტიკრიზისული გეგმა ხელს შეუწყობს სამშენებლო სექტორში სტაბილურობის შენარჩუნებას, დასაქმებას და ეკონომიკის ამუშავებას

ანტიკრიზისული პროგრამის ფარგლებში მთავრობის მიერ წარდგენილ სამშენებლო სექტორის მხარდაჭერის გეგმას დეველოპერები აფასებენ. მათ დღევანდელი სიტუაცია 12 წლის წინანდელ მდგომარეობას ახსენებთ. 2008 წელს ომის გამო საქართველოს ეკონომიკური მდგომარეობა მნიშვნელოვნად გაუარესდა და ერთ-ერთი ყველაზე მძიმე სიტუაცია მაშინ სწორედ სამშენებლო სექტორში შეიქმნა.

იმ პერიოდში, სამშენებლო სექტორის წარმომადგენლები კრიზისის წინაშე მარტო აღმოჩნდნენ. ერთის მხრივ, მათ უნდა შეესრულებინათ ვალდებულებები, მეორეს მხრივ კი მომხმარებელი შეენარჩუნებინათ. შედეგად, უკვე არსებულმა მენაშენეებმა თანხის გადახდა შეწყვიტეს. შესაბამისად, მოთხოვნა-მიწოდების ჯაჭვი გაწყდა და წარმოქმნილი პრობლემები დიდი ხნის განმავლობაში გაგრძელდა. საქართველოს მენაშენეთა ასოციაციის ხელმძღვანელის, ირაკლი როსტომაშვილი ინფორმაციით, ამ პროგრამის გარეშე კითხვის ნიშნის ქვეშ დგებოდა სექტორში დასაქმებული ადამიანებისთვის სამუშაო ადგილების შენარჩუნება. სამშენებლო სექტორის წარმომადგენლები აღნიშნავენ, რომ დეველოპერული სექტორის მხარდაჭერით, მთავრობა ადგილობრივ წარმოებასაც დაეხმარება.

ირაკლი როსტომაშვილის თქმით, პრობლემის თავიდან ასაცილებლად დეველოპერული სექტორის მხარდაჭერის ანტიკრიზისული გეგმა ხელს შეუწყობს სამშენებლო სექტორში სტაბილურობის შენარჩუნებას, დასაქმებას და ეკონომიკის ამუშავებას.

„ჩვენთვის ძალიან მნიშვნელოვანია, რომ მყისიერად მოხდეს თანხების შესვლა ეკონომიკაში. რომ დაიწყოს სექტორის ამუშავება და გაცოცხლება. ეს ნიშნავს ადამიანების დასაქმებას და სამუშაო ადგილების შენარჩუნებას. სამშენებლო სექტორს თუ შევხედავთ, სამშენებლო სექტორი არის ერთ-ერთი ყველაზე მაღალანაზღაურებადია და დაახლოებით 50-ზე მეტი სხვადასხვა სპეციალობის ადამიანი პოულობს დასაქმებას შესაძლებლობას ამ სექტორში“, -აცხადებს ირაკლი როსტომაშვილი.

სექტორის სხვა წარმომადგენლებიც აცხადებენ, რომ COVID-19-ის პანდემიით გამოწვეული კრიზისი, უძრავ ქონების გაყიდვის შემცირების გამო, სამშენებლო ბიზნესზე უარყოფითად აისახა. ტურიზმის შემდეგ ყველაზე დიდ დარტყმა სწორედ სამშენებლო სექტორმა მიიღო. ეს არის დარგი, რომელშიც რიცხობრივად ყველაზე მეტი ადამიანია დასაქმებული - მუშიდან დაწყებული არქიტექტორით დასრულებული. ეს დარგია პირველი რგოლი მნიშვნელოვან ეკონომიკურ ჯაჭვში - როცა იყიდება ბინა, ამის შემდეგ აქტიურდება სხვადასხვა მომიჯნავე დარგი. შესაბამისად, სამშენებლო სექტორის მხარდაჭერა სხვა ბიზნესებისთვისაც დიდი სტიმულია.