ბექა ლილუაშვილი: პროგრამის მიზანია სამშენებლო და მომიჯნავე სექტორში დასაქმებულების სამუშაო ადგილების შენარჩუნება და მოქალაქეების დახმარება ბინების შესაძენად

2008 წლის გამოცდილების გათვალისწინებით, ანტიკრიზისული სტრატეგიის ფარგლებში საქართველოს მთავრობის მიერ წარდგენილ დეველოპერების მხარდაჭერის გეგმას გადაცემა „ბიზნესი იმედზე“ ეხმაურება. იპოთეკური სესხის სუბსიდირების პროგრამის ფარგლებში ის, ვინც ბინის შესაძენად 2020 წლის ბოლომდე კომერციული ბანკებისგან სესხს აიღებს, მნიშვნელოვანი შეღავათებით ისარგებლებს.

პრემიერ-მინისტრის მრჩეველი ეკონომიკურ საკითხებში ბექა ლილუაშვილი გადაცემაში „ბიზნესი იმედზე“ აცხადებს, რომ პროგრამის მიზანია სამშენებლო და მომიჯნავე სექტორში დასაქმებული ადამიანების სამუშაო ადგილების შენარჩუნება და მოქალაქეების დახმარება ბინების შესაძენად. იპოთეკური სესხის აღების შემთხვევაში, სახელმწიფო მათ 4%-ით დაასუბსიდირებს. მსესხებლის რეალური ტვირთი საპროცენტო განაკვეთის მხოლოდ 7%-ი იქნება.

„მიუხედავად იმისა, რომ რეფინანსირების განაკვეთი შეიძლება შეიცვალოს, მომხმარებელი მუდმივად 7%-ს გადაიხდის. ამ მოცემულობით, იპოთეკურ სესხებზე 7% ლარში ფაქტობრივად ისტორიული მინიმუმია. ჩავთვალეთ, რომ 5 წლის განმავლობაში მთავრობის მიერ მოქალაქეების სუბსიდირება, საკმარისი მოტივაცია უნდა ყოფილიყო მსესხებლებისთვის. იპოთეკური სესხები 5, 10 და 15-წლიანია. ჩვენ მოვახდინეთ პორტფელის ანალიზი და ვთქვით, რომ პირველი 5 წელი ის პერიოდია, როდესაც მსესხებელი ყველაზე მეტ საპროცენტო განაკვეთს იხდის. ჩვენ ვაძლევთ საშუალებას სექტორს, რომ გავუზარდოთ ხელმისაწვდომობა ფინანსებზე. ეს ასევე დიდი პრობლემაა, რადგან ფინანსური სექტორი თავს იკავებს ხოლმე დაფინანსებისგან, განსაკუთრებით კრიზისის პერიოდში და განსაკუთრებით სამშენებლო სექტორში. ჩვენ შევქმენით ისეთი ინსტრუმენტები, რაც სექტორს გაუჩენდა შესაძლებლობას, რომ მარტივად ჰქონოდა წვდომა ფინანსურ რესურსებზე“, - აცხადებს ბექა ლილუაშვილი.

არსებული გათვლებით, სამშნებელო სექტორში, პირდაპირი და ირიბი გზით, დასაქმებულია დაახლოებით 250 000 ადამიანი.