გიორგი გახარია: ბიუჯეტში ხარჯები დაახლოებით 600 მლნ-ით შემცირდება და ბიუჯეტის დეფიციტი ამ პარამეტრებით დახლოებით 8.5% იქნება

ყველა მიმდინარე და კაპიტალური ხარჯის თვალსაზრისით ბიუჯეტში შემცირდება ხარჯები დაახლოებით 600 მლნ-ით და ბიუჯეტის დეფიციტი ამ პარამეტრებით საპროგნოზო იქნება დახლოებით 8.5%, - ამის შესახებ საქართველოს პრემიერ-მინისტრმა, გიორგი გახარიამ უწყებათაშორის საკოორდინაციო საბჭოსთან არსებული ეკონომიკური ჯგუფის სხდომაზე, ანტიკრიზისული ბიუჯეტის პრეზენტაციისას განაცხადა.

„ეს არის ძირითადი პარამეტრები ბიუჯეტის, რომელსაც დღეს ფინანსთა სამინისტრო წარმოგვიდგენს, თუმცა ჩვენ საერთაშორისო პარტნიორებთან მუშაობით ვპროგნოზირებთ, რომ საქართველო იქნება ერთ-ერთი პირველი ქვეყანა, რომელიც შეძლებს ანტიკრიზისულ აღდგენას. მომავალი წლის ეკონომიკური ზრდის საპროგნოზო მაჩვენებელი არის 4%, ხოლო 2022 წლის ეკონომიკის ზრდის საპროგნოზო მაჩვენებელი, რომელიც არის ასევე საერთაშორისო სავალუტო ფონდთან შეთანხმებული, დაახლოებით 6% გახლავთ.

მაგრამ ყველას უნდა გვახსოვდეს, რომ ყველაფერი არის პროგნოზი და დღევანდელი გლობალური კრიზისის ყველაზე დიდი გამოწვევა გახლავთ არაპროგნოზირებადობა, ამიტომ, ჩვენ ყველანი როგორც ეპიდემიოლოგიურ, ასევე ეკონომიკის თვალსაზრისით მზად უნდა ვიყოთ ყველა სახის გამოწვევისთვის. სწორედ ეს გვკარნახობს, რომ ის მწირი რესურსი, რომელიც ქვეყანას აქვს, ძალზე ფრთხილად, მაქსიმალურად გონივრულად და სამარლიანად იყოს გამოყენებული. ეს არის ძირითადი პრინციპები, როდესაც ჩვენ, მაგალითად, მიზნობრივი სოციალური დახმარება ჩვენს მოქალაქეებზე გავანაწილეთ 6 თვეზე და არ მივეცით ერთჯერადად და კიდევ ბევრი ნაბიჯი, რომელიც ეკონომიკური თვალსაზრისითაც განპირობებული იყო სწორედ ამ დიდი გამოწვევით“, - აღნიშნა პრემიერ-მინისტრმა.