გიორგი გახარია: 2020 წლის ბიუჯეტში გადაზღვეულია ყველა სოციალური რისკი, რომელიც შეიძლება წლის ბოლომდე შეგვხვდეს

პრემიერ-მინისტრმა ფინანსთა სამინისტროს 2020 წლის ანტიკრიზისული ბიუჯეტის პროექტის შემუშავებისთვის მადლობა გადაუხადა. როგორც გიორგი გახარიამ მთავრობის სხდომაზე აღნიშნა, დოკუმენტზე ყველა ეკონომიკურმა უწყებამ სისტემურად იმუშავა.

„ეს არის მართლაც სერიოზული ნაშრომი, რომელშიც გადაზღვეულია როგორც ქვეყანაში შესაძლო ინფიცირების მეორე ტალღა, ასევე ყველა ის სოციალური რისკი, რომელიც შეიძლება წლის ბოლომდე შეგვხვდეს. ამიტომ, მე კიდევ ერთხელ მინდა, გადავუხადო მადლობა ფინანსთა სამინისტროს“, - აღნიშნა პრემიერმა.

მისი თქმით, ბიუჯეტის ერთ-ერთი მთავარი მიღწევა წლის დასაწყისში გაცხადებული პენსიების ზრდის პარამეტრების შენარჩუნება გახდა, რომელთა მიხედვითაც 1-ლი ივლისიდან 70 წელს ზემოთ პენსიონერები დამატებით 30 ლარს მიიღებენ და მათი პენსია 250 ლარი გახდება, მაღალმთიან სოფლებში მცხოვრები პენსიონერები კი ყოველთვიურად 300 ლარს მიიღებენ.

„გარდა ამისა, ჩვენ შევძელით და ჩავდეთ დაზღვევის მექანიზმები, რომლებიც გარანტირებულად, ყოველწლიურად აძლევს ჩვენს პენსიონერებს შესაძლებლობას, რომ პენსია გაიზარდოს. ეს ზრდა იქნება დაკავშირებული როგორც ინფლაციასთან, ასევე 70 წელს ზემოთ პენსიონერებისთვის ეკონომიკური ზრდის 80%-ის მაჩვენებელთან“, - განაცხადა პრემიერმა.

2020 წლის ანტიკრიზისული ბიუჯეტის ხარჯები 15 მლრდ 923 მლნ ლარამდე იზრდება. საბიუჯეტო დეფიციტის ზრდა 2.5%-დან 8.5%-მდეა დაგეგმილი. წელს მთავრობა -4%-იან ვარდნას პროგნოზირებს. ბიუჯეტში ცვლილებების განხილვა პარლამენტში 10 ივნისს დაიწყო.