ნათია თურნავა: უმჯობესია, ვიმოგზაუროთ საქართველოში და ჩვენი ვალუტით საქართველოს დავეხმაროთ

უმჯობესია, ვიმოგზაუროთ საქართველოში და ჩვენი ვალუტით დავეხმაროთ სწორედ საქართველოს, რადგან წინა წლებში რამდენადაც შემოდიოდა უცხოელი ტურისტების მიერ დახარჯული ვალუტა, იმდენი გადიოდა ჩვენი მოქალაქეების მიერ გარეთ დახარჯული ვალუტა საზღვარგარეთ დასვენების დროს, - ასე გამოეხმაურა ეკონომიკის მინისტრი, ნათია თურნავა მთავრობის ადმინისტრაციასთან გუშინ გამართულ აქციას, რომლის მონაწილეებიც რეგულარული საერთაშორისო ავიარეისების აღდგენასა და ორკვირიანი კარანტინის გაუქმებას ითხოვდნენ.

მისივე თქმით, მთავრობა ძალიან კარგად ხედავს, რომ ტურისტული ინდუსტრია ძალიან დაზარალდა და სწორედ ამიტომ ყველა პროგრამისა და გადაწყვეტილების სათავესა და მოტივაციაში ტურიზმის დახმარებაა ასახული.

„ეს იყო დარგი, რომელსაც ერთ-ერთ პირველს დავეხმარეთ და გეუბნებით ამთავითვე, რომ ვფიქრობთ, კიდევ როგორ დავეხმაროთ შემდგომში, რადგან ეს პრობლემა ერთი დღით არ შემოიფარგლება. ჩემი აზრით, არაა საჭირო დემონსტრაციების გზით მოითხოვონ რომელიმე ჩემს კოლეგასთან ან პრემიერ-მინისტრთან შეხვედრა, რადგან ჩვენი კარი ყოველთვის ღიაა. მაგალითად, ორიოდე დღის წინ შედგა საკმაოდ წარმომადგენლობითი შეხვედრა ჩემი მონაწილეობითა და ტურიზმის ეროვნული ადმინისტრაციის ხელმძღვანელობით განთავსებისა და ტურიზმის დარგთან. ბევრი სასტუმროს წარმომადგენელი მონაწილეობდა, ასევე ტურ-ოპერატორები, სხვადასხვა ასოციაცია და ძალიან საქმიან, მშვიდ ვითარებაში განვიხილეთ ყველა საკითხი, ყველა გადაწყვეტილება, ყველა რისკი და სიკეთე, რაც შეიძლება ამ გადაწყვეტილებით მოვიდეს. ყველანი ვთანხმდებით, რომ უნდა ვიყოთ ძალიან ფრთხილად, არ უნდა დავხარბდეთ ერთჯერად, სწრაფ და ეფექტურ გადაწყვეტილებას, რომ გავხსნათ ყველასთან საზღვრები, თუმცა ამის შესაძლებლობას იძლევა ისიც, რომ ჩვენ 15 ქვეყანას შორის მოვხვდით და შეიძლება, ისე მოხდეს, რომ ორი-სამი კვირის თავზე მოგვიწიოს მასშტაბური, საპირისპირო გადაწყვეტილებების მიღება და ისევ დახურვა გარკვეული დარგების, რასაც ჩვენი ეკონომიკა ვერ გადაიტანს“, - განაცხადა ნათია თურნავამ.