აჭარაში საგანმანათლებლო ინფრასტრუქტურის პროექტები გრძელდება

აჭარის მთავრობის თავმჯდომარესთან, ზურაბ პატარაძესთან და ავტონომიური რესპუბლიკის ხელმძღვანელობასთან ერთად გავეცანით ბათუმში მუნიციპალური განვითარების ფონდის მიერ განხორციელებულ რამდენიმე მნიშვნელოვან პროექტს, რომლებიც სასკოლო ინფრასტრუქტურის განახლებასა და თანამედროვე საბავშვო ბაღების მშენებლობას მოიცავს, - განაცხადა ინფრასტრუქტურის მინისტრმა რევაზ სოხაძემ.

მისივე თქმით, სასკოლო ინფრასტრუქტურის განვითარება და განახლება ინფრასტრუქტურის სამინისტროს ერთ-ერთი მთავარი პრიორიტეტი და მნიშვნელოვანი გამოწვევაა. განსაკუთრებით სასიხარულოა, რომ ბათუმში ახალ სასწავლო წელს, დაახლოებით, 2 500 მოსწავლე განახლებულ სასკოლო გარემოში გააგრძელებს სწავლას.

ინფრასტრუქტურის სამინისტროს ინფორმაციით, ახალი სასწავლო წლის დაწყების წინ, აჭარაში საქართველოს ინფრასტრუქტურის სამინისტროს მუნიციპალური განვითარების ფონდის მიერ განხორციელებული სკოლამდელი და სასკოლო საგანმანათლებლო ინფრასტრუქტურის რამდენიმე პროექტი დასრულებულია, ნაწილზე კი სამუშაოები გრძელდება.

განახლებულ საგანმანათლებლო დაწესებულებებში, ასევე იმყოფებოდნენ ინფრასტრუქტურის მინისტრი ბათუ გურჯიძე, მუნიციპალური განვითარების ფონდის დირექტორი გიორგი შონია, ბათუმის მერი გიორგი ცინცაძე, ბათუმის საკრებულოს თავმჯდომარე ივანე მაისურაძე და აჭარის განათლების მინისტრი მაია ხაჯიშვილი.

ბათუმში სრულად განახლდა №4 და №5 საჯარო სკოლები, რომლებიც ჯამში 1 100 მოსწავლისთვისაა გათვალისწინებული. ორივე სკოლაში მოეწყო თანამედროვე საგანმანათლებლო სტანდარტების შესაბამისი სასწავლო და საერთო სივრცეები, განახლდა საინჟინრო სისტემები და მოწესრიგდა გარე ინფრასტრუქტურა. სკოლები სრულად ადაპტირებულია სპეციალური საგანმანათლებლო საჭიროების მქონე მოსწავლეებისთვის.

№5 საჯარო სკოლაში განახლდა საკლასო ოთახები, ბიბლიოთეკა და სამეცნიერო ლაბორატორია, მოეწყო საფეხბურთო მინიმოედანი და სრულად შეიცვალა გათბობის, წყალმომარაგებისა და წყალარინების სისტემები. №4 საჯარო სკოლაში, სასწავლო სივრცეებთან ერთად, განახლდა სპორტული მოედანი და სკოლის ეზო, მოწესრიგდა საინჟინრო სისტემები და ჩატარდა შენობის ენერგოეფექტიანობის გაუმჯობესების სამუშაოები.

ორივე სკოლის რეაბილიტაცია საქართველოს მთავრობისა და მსოფლიო ბანკის თანადაფინანსებით გახდა შესაძლებელი.
როგორც მინისტრმა აღნიშნა, ბოლო რამდენიმე კვირის განმავლობაში ათეულობით ახალი სკოლის მშენებლობისა და რეაბილიტაციისთვის ტენდერი უკვე გამოცხადდა და ეს პროცესი კიდევ უფრო გააქტიურდება.

,,ასევე, დავათვალიერეთ თანამედროვე სტანდარტების და შესაბამისი ინვენტარით აღჭურვილი საბავშვო ბაღები, სადაც სასწავლო-სააღმზრდელო პროცესი უკვე განახლებულ გარემოში გაგრძელდება. ჩვენი სურვილია, რაც შეიძლება, მეტ მოქალაქეს ჰქონდეს შესაძლებლობა, ისარგებლოს თანამედროვე და ხარისხიანი ინფრასტრუქტურით“, - განაცხადა რევაზ სოხაძემ.
ინფრასტრუქტურის სამინისტროს მუნიციპალური განვითარების ფონდის მიერ ბათუმში დასრულებულია №3, №12 და №26 საბავშვო ბაღების რეაბილიტაციაც. სამი განახლებული ბაღი ჯამში 475 აღსაზრდელისთვისაა განკუთვნილი.

საბავშვო ბაღებში სრულად განახლდა შიდა და გარე სივრცეები, მოეწყო სასწავლო, სათამაშო და მოსასვენებელი ოთახები, მოწესრიგდა საინჟინრო კომუნიკაციები, გათბობისა და უსაფრთხოების სისტემები, სველი წერტილები და სამზარეულო სივრცეები. განახლებული ბაღები ადაპტირებულია განსაკუთრებული საჭიროების მქონე ბავშვებისთვის.

ამასთან, ბათუმში გრძელდება №18 და №23 საბავშვო ბაღების სრული რეკონსტრუქცია-რეაბილიტაცია. №18 ბაღი 250, ხოლო №23 ბაღი 300 აღსაზრდელს მოემსახურება. პროექტები ითვალისწინებს არსებული შენობების გამაგრება-გაძლიერებას, შიდა და გარე სივრცეების სრულ განახლებას.

მუნიციპალური განვითარების ფონდმა გასულ კვირას აჭარაში ახალი საგანმანათლებლო ინფრასტრუქტურის პროექტების განხორციელებისთვის ტენდერებიც გამოაცხადა. მათ შორისაა ბათუმის მუნიციპალიტეტის გონიოს დასახლებაში 200 ბავშვისთვის გათვალისწინებული ახალი საბავშვო ბაღის მშენებლობა და ხულოს მუნიციპალიტეტის სოფელ რიყეთის საჯარო სკოლის რეკონსტრუქცია-რეაბილიტაცია.

ინფრასტრუქტურის სამინისტრო საგანმანათლებლო ინფრასტრუქტურის პროექტების განხორციელებას ეტაპობრივად განაგრძობს. სამინისტროსთვის პრიორიტეტია როგორც მიმდინარე პროექტების დროულად და ხარისხიანად დასრულება, ისე ბავშვებისა და მოსწავლეებისთვის უსაფრთხო, თანამედროვე და ინკლუზიური საგანმანათლებლო გარემოს შექმნა.