თორნიკე ზირაქიშვილი: მოკვლეულია 400-ზე მეტი კომპანია და მოწოდების ჯაჭვების ცვლილებაზე გაზრდილი მოთხოვნის პირობებში ვეცდებით, ისინი დავარწმუნოთ, რომ საქმიანობა საქართველოში გადმოიტანონ

Covid-19-ის პანდემია საფრთხესთან ერთად, რიგი ქვეყნებისათვის ახალ შესაძლებლობებასაც ქმნის. გამოწვევა, როგორც შესაძლებლობა, - ეს ტერმინი საქართველოში ბოლო პერიოდში დამკვიდრდა. შექმნილ ვითარებაში საქართველოც ცდილობს თავისი წილი ეკონომიკური სარგებლის მიღებას.

კოვიდ-19-ის პანდემიის შედეგებიდან გამომდინარე, გლობალური კორპორაციებისა და საწარმოთა რელოკაციას პროცესი დაჩქარდა. როგორც გადაცემა „ბიზნესი იმედზე“ საუბარში სააგენტოს „აწარმოე საქართველოში“-ს დირექტორის მოადგილე, თორნიკე ზირაქიშვილი აცხადებს, მოძიებულია 400-ზე მეტი კომპანია და მოწოდების ჯაჭვების ცვლილებაზე გაზრდილი მოთხოვნის პირობებში ვეცდებით, ისინი დავარწმუნოთ, რომ საქმიანობა საქართველოში გადმოიტანონ.

„კომპანიები შევარჩიეთ სწორედ იმ პრინციპების მიხედვით, რა შეიძლება ქვეყანაში განვითარდეს და სად შეიძლება დამატებითი სამუშაო ადგილები შეიქმნას. სწორედ ამ პრინციპზე დაყრდნობით შევარჩიეთ ეს 400 წამყვანი კომპანია მსოფლიოში. უკვე იყო რამენიმე შემოთავაზება სხვადასხვა კომპანიისგან. ველოდებით რომ წლის ბოლომდე შედგება დაინტერესებული კომპანიების მენეჯერების ვიზიტი, ისინი ჩამოვლენ და დაიწყებენ ადგილების მოძიებას. რა თქმა უნდა, ეს პროცესი მუდმივად გაგრძელდება. ჩვენი თვითმიზანი არ არის მხოლოდ 400 კომპანიასთან კომუნიკაცია, ჩვენი მიზანია რომ რაც შეიძლება მეტი ინვესტორი შემოვიდეს საქართველოში“ - აღნიშნა თორნიკე ზირაქიშვილმა.

ფაქტია, დღევანდელი მოცემულობა მნიშვნელოვნად განსხვავდება სამი ათწლეული წლის წინ არსებული მდგომარეობისგან. მაშინ მწარმოებლებმა თავიანთი საქმიანობა ჩინეთში სხვადასხვა მიზეზების, მათ შორის, დაბალი დანახარჯებისა და იაფი მუშახელის გამო გადაიტანეს. თუმცა, ამჟამად მოცემულობა იცვლიება და პრიორიტეტი სხვა სახის „უსაფრთხო“ ქვეყნებს ენიჭება, სადაც საქართველოს ნამდვილად აქვს კონკურენტული უპირატესობა. Covid-19-ის პანდემია საფრთხესთან ერთად ახალ შესაძლებლობებასაც ქმნის.