მარიამ ქვრივიშვილი: გაეროს მსოფლიო ტურიზმის ორგანიზაციის აღმასრულებელი საბჭოს სხდომა საქართველოში, ქვეყნის ცნობადობის გაზრდასა და სწორ პოზიციონირებას ნიშნავს

საქართველო გაეროს მსოფლიო ტურიზმის ორგანიზაციის აღმასრულებელი საბჭოს 112-ე სხდომას მასპინძლობს. კოვიდ-19-ის პანდემიის შემდეგ ეს მსოფლიოში პირველი მაღალი რანგის წარმომადგენლობითი ღონისძიებაა, - ამის შესახებ ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის ხელმძღვანელმა „ქრონიკის“ ეთერში ისაუბრა.

მარიამ ქვრივიშვილის თქმით, დიდი პატივი გვხვდა წილად, რომ ასეთი ღირებულების მქონე და მნიშვნელოვანი ღონისძიების მასპინძელი ქვეყანა გავხდით

„პანდემიამდე გაეროს მსოფლიო ტურიზმის ორგანიზაციას გადაწყვეტილი ჰქონდა, რომ პირველად, ღონისძიება ჩატარდებოდა ესპანეთს გარეთ. საქართველო იქნა შერჩეული, არაერთი ინსპექტირების შემდგომ. შემოწმდა საქართველოს ინფრასტრუქტურული მზაობა, ტურისტული პროდუქტების მზაობა, კერძო სექტორის მზადყოფნა. როგორც კი შეფასდა, რომ საქართველო მზად არის უმასპინძლოს ასეთი დიდი მნიშვნელობის მქონე ღონისძიებას, საქართველოზე შეჩერდა აქცენტი. ამის მიზეზი მარტივია, ჩვენი უსაფრთხოება და ის წარმატებული პანდემიასთან ბრძოლის ისტორია, რომელიც საქართველომ ანახა სრულიად მსოფლიოს“, - განაცხადა მარიამ ქვრივიშვილმა.

სხდომა მსოფლიო ჯანდაცვის ორგანიზაციისა და საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის გაიდლაინებისა და უსაფრთხოების სრული დაცვით ტარდება. ღონისძიების ფარგლებში გაიმართება საინვესტიციო პანელი, სადაც ქართულ მხარეს საშუალება ექნება საკუთარი ბიზნეს-ხედვები გააცნოს ტურიზმის ინდუსტრიას, პოტენციურ პარტნიორებს კი კონკრეტული პროექტები.