ნიკოლოზ გაგუა: იმედი გვაქვს, მომავალი თვეები ეკონომიკური ზრდის გაუმჯობესების ტენდენციას გვაჩვენებს

ქვეყანაში მიმდინარე ეკონომიკური დინამიკა, სავალუტო ფონდთან დასრულებული დისტანციური მისიის შედეგები და ავტორიტეტული ორგანიზაციების შეფასებები წარადგინეს ფინანსთა სამინისტროში.

მინისტრის მოადგილის, ნიკოლოზ გაგუას თქმით, კორონავირუსის გამო შექმნილი პანდემიიდან გამომდინარე, საქართველოს წლის განმავლობაში მნიშვნელოვანი კლება ჰქონდა, თუმცა ბოლო პერიოდში ეს მაჩვენებელი მეტ-ნაკლებად დასტაბილურდა. სამინისტროში პროგნოზირებენ, რომ 2021 წელს ქვეყანა 5%-იან ზრდის მაჩვენებელს დაუბრუნდება.

„ყველას მოგეხსენებათ, თუ რამდენად დიდი პრობლემის წინაშე დადგა მსოფლიო ეკონომიკა პანდემიური მოვლენების განვითარების შედეგად და ბუნებრივია ჩვენც არ ვართ გამონაკლისი. მიმდინარე წლის განმავლობაში მნიშვნელოვანი ეკონომიკური კლება დაფიქსირდა, თუმცა ბოლო პერიოდში აღნიშნული მაჩვენებლები მეტ-ნაკლებად დასტაბილურდა და ბოლო თვეს 5,5%-იანი კლება იყო მხოლოდ, წინა თვეებისგან განსხვავებით. ჩვენი პროგნოზი ეკონომიკურ ზრდასთან დაკავშირებით კვლავაც რჩება მინუს 4-5%-ის ფარგლებში. მოგეხსენებათ სავალუტო ფონდმა გუშინდელ ანგარიშში მინუს 5%-იანი ეკონომიკური ზრდის მაჩვენებელი. ჩვენ იმედი გვაქვს, რომ მომავალი თვეები გაუმჯობესების ტენდენციას გვაჩვენებს.

ასევე ძალიან მნიშვნელოვანია მომავალი წლის ეკონომიკური პერსპექტივებიც გამოვსახოთ. ჩვენი შეფასებებით, 2021 წელს ველოდებით დაახლოებით 5%-იან ეკონომიკურ ზრდას. აზიის განვითარების ბანკმა რამდენიმე დღის წინ გამოაქვეყნა დაახლოებით 4,5 %-იანი ეკონომიკური ზრდა, ხოლო სავალუტო ფონდიც პრინციპში ჩვენს 5%-იან მაჩვენებელს ეთანხმება. ჩვენ ვთქვით რომ 2021 წელს ქვეყანაში უკვე დაბრუნდება ზრდა 5%-იანი მაჩვენებლის ფარგლებში“, - განაცხადა ნიკოლოზ გაგუამ.

ნიკოლოზ გაგუას განცხადებით, სავალუტო ფონდის ანგარიშში დადებითად არის შეფასებული ქვეყნის ეკონომიკური გადაწყვეტილებები პანდემიის მართვის პერიოდში.

„ნიშანდობლივია, რომ სავალუტო ფონდის ანგარიშში ძალიან მკაფიოდ გამოიკვეთა წარმატება პანდემიის მართვაში და ზოგადად ეკონომიკურ მართვაში. მისიის განცხადებით, ისინი მხარს უჭერენ იმ სოციალურ ღონისძიებებს გადასახადის შემსუბუქების გადაწყვეტილებას, რომელიც მთავრობამ მიიღო მოწყვლადი სექტორების მიმართ და ისინი თვლიან, რომ ეს მნიშვნელოვნად შეამსუბუქებს იმ პრობლემებს, რომელიც სოციალურ სექტორში და მოწყვლად ბიზნეს-სექტორში არსებობს. ფონდი განსაკუთრებით ხაზგასმით აღნიშნავს საქართველოს წარმატებას ეკონომიკური რეფორმების მიმართულებაში. კონკრეტულად პენსიების ინდექსაცია, რომელიც რეალურად აწესებს წესს, თუ როგორ უნდა გაიზარდოს ყოველწლიურად პენსია, მიუხედავად პოლიტიკური გადაწყვეტილებებისა“, - განაცხადა ნიკოლოზ გაგუამ.

სავალუტო ფონდის პროგნოზით საქართველოს ეკონომიკა 5%-ით შემცირდება.