როდის არ არის სავალდებულო ფასის ლარში გამოხატვა

ეროვნული ბანკის პრეზიდენტის ბრძანების მიხედვით, ფასის მხოლოდ ლარით გამოხატვის მოთხოვნა არ ვრცელდება, თუ მეწარმის მიერ საქართველოს ტერიტორიაზე ქონების რეალიზაცია, მომსახურების გაწევის შეთავაზება და რეკლამირება დაკავშირებულია:

ავიაბილეთების რეალიზაციასთან, სასტუმროს და ტურისტულ მომსახურებასთან, თუ ხორციელდება უცხო ენაზე, ასევე - აზარტულ თამაშებთან;

ტვირთების საერთაშორისო, საზღვაო, საჰაერო, სახმელეთო გადაზიდვებთან, ასევე - ყველა სახის სარკინიგზო გადაზიდვებთან და გადაზიდვებთან  დაკავშირებულ მომსახურებასთან;

თავისუფალი ვაჭრობის პუნქტებში, თავისუფალ ინდუსტრიულ ზონებსა და აეროპორტის გაფრენის ზონებში ქონების რეალიზაციის და მომსახურების გაწევასთან;

როუმინგის მომსახურებასთან;

უცხოეთში გადაზღვევის მომსახურებასთან;

ინტელექტუალური საკუთრების ობიექტების დაპატენტებასთან, რეგისტრაციასთან და დეპონირებასთან დაკავშირებულ მომსახურებასთან;

ელექტროენერგიის, ბუნებრივი აირის, ნავთობის და წყალმომარაგების იმპორტთან, ექსპორტთან, რეექსპორტთან და ტრანზიტთან;

არარეზიდენტის მიერ, მათ შორის მისი მუდმივი დაწესებულების მეშვეობით, და არარეზიდენტისთვის მომსახურების გაწევასთან, სამუშაოს შესრულებასთან და საქონლის მიწოდებასთან;

ენერგეტიკის დარგში საერთაშორისო, უცხო ქვეყნის საფინანსო ინსტიტუტების და ინვესტორის დაფინანსებით, მათ შორის ნაწილობრივი დაფინანსებით, განსახორციელებელი პროექტების ფარგლებში საქონლის მიწოდება, მომსახურების გაწევასთან და სამუშაოების, მათ შორის სამშენებლო სამუშაოების შესრულებასთან;

ოკუპირებულ ტერიტორიებზე ენერგეტიკის დარგში განხორციელებული საქმიანობის ფარგლებში საქონლის რეალიზაციასთან და მომსახურების გაწევასთან;

საერთაშორისო ხელშეკრულებების, შეთანხმებების და მემორანდუმების ფარგლებში აღებული ვალდებულებების შესრულებასთან, ასევე - კანონით განსაზღვრულ შემთხვევებთან;

უცხოური საგადახდო სისტემის გამოყენებით უცხოური ვალუტით განხორციელებულ მომსახურებასთან;

მიმოქცევად ფასიან ქაღალდთან და ეკვივალენტთან, რომელიც ადასტურებს წილობრივ მონაწილეობას უცხოურ კომპანიაში; მიმოქცევად სასესხო ინსტრუმენტთან და ვალდებულებასთან; სხვა მიმოქცევად ფასიან ქაღალდთან, რომელიც იძლევა ფასიანი ქაღალდების შეძენის უფლებას მასზე ხელმოწერის, მისი ყიდვის და გაცვლის გზით, რომლის შესრულება ხდება შეთანხმებულ და მიმდინარე ფასთა შორის სხვაობის დაფარვით, რომელიც ითვალისწინებს ფულად ანგარიშსწორებას, ერთობლივი საინვესტიციო ფონდის მიერ ემიტირებულ უფლებასთან; ფულის და სავალუტო ბაზრის ინსტრუმენტებთან; ანგარიშზე რიცხულ ძვირფას ლითონებთან; ასევე ჩამოთვლილ ინსტრუმენტებთან დაკავშირებულ მოთხოვნებთან და უფლებებთან (ეს პუნქტი ვრცელდება მხოლოდ უცხოურ ვალუტაში დენომინირებულ ინსტრუმენტებზე).

სატელევიზიო, ონლაინ და საჯარო სივრცეში ქონების რეალიზაციის, მომსახურების გაწევის შეთავაზების და რეკლამირებისას ფასის მხოლოდ ლარით გამოხატვის წესი სავალდებულო 2017 წლის პირველი ივლისიდან ხდება.

ფასის მხოლოდ ეროვნული ვალუტით გამოხატვის ვალდებულება დაეკისრება ყველა მეწარმე ფიზიკურ და იურიდიულ პირს (ინდივიდუალური მეწარმე, სოლიდარული პასუხისმგებლობის საზოგადოება (სპს), კომანდიტური საზოგადოება (კს), შეზღუდული პასუხისმგებლობის საზოგადოება (შპს), სააქციო საზოგადოება (სს, კორპორაცია), კოოპერატივი).

ფასის მხოლოდ ეროვნული ვალუტით გამოხატვის ვალდებულება არ აქვს ფიზიკურ პირს.

წესის დარღვევის შემთხვევაში გათვალისწინებულია სანქციები.