ლევან დავითაშვილის თქმით, სუბსიდირების პროგრამაში ჩართულ 60-ზე მეტ პურის საცხობს ფქვილის სპეციალურ ფასად მიღება შეუძლია

60-ზე მეტი პურის საცხობი სუბსიდირების პროგრამაში არის ჩართული, რომლებსაც შეუძლიათ სპეციალურ ფასად მიიღონ ფქვილი, რასაც გამოიყენებენ ერთადერთი მიზნისთვის, რაც ნიშნავს ფართო მოხმარების პურის წარმოებას, - ამის შესახებ საქართველოს გარემოს დაცვისა და სოფლის მეურნეობის მინისტრის მოვალეობის შემსრულებელმა, ლევან დავითაშვილმა განაცხადა.

მან აღნიშნა, რომ სუბსიდირების პროგრამის ფარგლებში, სამრეწველო პურისთვის საჭირო ფქვილი მთლიანად დაასუბსიდირეს. მისივე თქმით, ახალი მოსავლის პროგნოზები გამოჩნდება 2021 წელს და ამის შემდეგ გადაწყვეტენ, გააგრძელებენ თუ არა სუბსიდირების პროგრამას.

„ანუ ჩვენ გადავდივართ უკვე იმ ნიშნულს მიღმა, სადაც ფქვილის ფასი პირდაპირ დაკავშირებულია პურის ფასთან და პურის ფასი უნდა გაზრდილიყო. ჩვენ გვქონდა მთელი შემოდგომის პერიოდში საუბარი, რეგულარული შეხვედრები როგორც ფქვილის მწარმოებელთა ასოციაციასთან, ისე პურის მწარმოებელთა ასოციაციასთან. ეს ორი რგოლი თუ არ არის სინქრონში, ჩვენ ვერ მოვახერხებთ შედეგის მიღებას და საბოლოოდ იმ ფორმულაზე შევჯერდით, რომელიც დღეს მუშაობს. ეს არის, რომ ჩვენ ფაქტობრივად, სამრეწველო პურისთვის საჭირო ფქვილი მთლიანად დავასუბსიდირეთ. რა თქმა უნდა, ვერ მოვიცავით ყველა, რომელიც პურპროდუქტებს და პურფუნთუშეულს აწარმოებს, აქ ასორტიმენტი არის ძალიან დიდი. ეს არ არის მხოლოდ პური, ეს არ არის მხოლოდ სოციალური საჭიროება, აქ არის ბევრი ფუფუნების პროდუქტი, მათ შორის სხვადასხვა სახეობის პური და ა.შ. მაგრამ, რასაც სამრეწველო პური ჰქვია, გარანტირებულად აქ ფასს ჩვენ ვინარჩუნებთ. ეს არის ყველაზე იაფი მექანიზმი და შედეგიანი მექანიზმი. ჩვენ თუ ამოცანა გვაქვს, რომ სოციალურად შეჭირვებულ კატეგორიის დაცვა მოვახერხოთ, ამას ვაკეთებთ, მაგრამ ის, რომ საბიუჯეტო რესურსი ასე ვთქვათ, გავისროლოთ, მაქსიმალურად მოვახმაროთ ყველას და ყველაფერს, ამას არ ვაკეთებთ. ამიტომ ცალსახაა, რომ ეს პროგრამა იმუშავებს დადებითად 4 თვის განმავლობაში, მარტის ბოლომდე. ეს იმისთვის, რომ ჩვენ დავაკვირდეთ ბაზრის კონიუნქტურას, რადგან ჩვენ ვხედავთ, რომ ისტორიულ მაქსიმუმზეა დღეს ხორბლის ფასები. არავინ იცის, შეიძლება კიდევ გაძვირდეს, მაგრამ შეიძლება შემცირდეს კიდევაც და ამის მოლოდინიც არის. ვფიქრობ, უფრო შეიძლება შემცირდეს.

ახალი მოსავლის პროგნოზები გამოჩნდება 2021 წელს და ამის შემდეგ გადავწყვეტთ უკვე, გავაგრძელებთ თუ არა სუბსიდირების პროგრამას“, - განაცხადა დავითაშვილმა.