დავით სონღულაშვილი დაინტერესდა, რა ხედვა და პოლიტიკა აქვთ მინისტრობის კანდიდატებს განახლებადი ენერგიის მიმართულებით

„ერთ-ერთი ყველაზე მნიშვნელოვანი რესურსი, რაც გვაქვს, ეს არის განახლებადი ენერგია, რომელიც ღირებული რესურსია და რას ვაპირებთ ამასთან დაკავშირებით, საინტერესოა, ამ მიმართულებით რა ხედვა და რა პოლიტიკა გვაქვს?“,- ამის შესახებ დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ საფინანსო-საბიუჯეტო, აგრარულ საკითხთა, დარგობრივი ეკონომიკისა და ეკონომიკური პოლიტიკის, გარემოს დაცვისა და ბუნებრივი რესურსების და რეგიონული პოლიტიკისა და თვითმმართველობის კომიტეტების ერთობლივ სხდომაზე განაცხადა.

აღნიშნული კითხვით დავით სონღულაშვილმა მინისტრობის კანდიდატებს მიმართა. კომიტეტის თავმჯდომარის კითხვები სახმელეთო ტრანსპორტის რეფორმას, განახლებად ენერგიას, კაპიტალის ბაზრის რეფორმას, ლარის სტაბილურობას, რეგიონების წყალმომარაგებას, თუშეთის საბაგირო გზას და მოსახლეობის ინტერნეტზე წვდომას ეხებოდა.

„სახმელეთო ტრანსპორტთან დაკავშირებით - რა რეფორმებს ვაპირებთ ამ მიმართულებით, ერთ-ერთი მნიშვნელოვანი ნაწილია იმ სპექტრის, რომელიც გასაკეთებელია. აუცილებლად მინდა ვიკითხო პირდაპირ უცხოურ ინვესტიციებთან დაკავშირებით, რა არის პრიორიტეტული მიმართულებები, თუ გვაქვს რამე გეგმა ამასთან დაკავშირებით, ხომ არ იქნებოდა შესასწავლი ამ მიმართულებით რა ტიპის ბიუროკრატიას აწყდებიან ხოლმე ინვესტორები და შეიძლება თუ არა, წახალისების კუთხით მოვხსნათ ბარიერები, თუ აქვთ. ელექტროენერგიის მოხმარება იზრდება ყოველწლიურად და ამასთან დაკავშირებით, მიყვება იმპორტიც, გენერაცია არ მიყვება ამ ზრდას და რა პოლიტიკა გვაქვს ჯამში? ერთ-ერთი ყველაზე მნიშვნელოვანი რესურსი, რაც გვაქვს, ეს არის განახლებადი ენერგია, რომელიც ღირებული რესურსია და რას ვაპირებთ ამასთან დაკავშირებით, რა ხედვა გვაქვს და ამ მიმართულებით რა პოლიტიკა გვაქვს?

ძალიან მნიშვნელოვანია კაპიტალის ბაზრის რეფორმაზე რასაც საუბრობდით და ამასთან დაკავშირებით, რამდენად ვართ მზად? ერთია, რომ კაპიტალის ბაზარი გვინდა და მეორეა, რამდენად მზად არიან კომპანიები ამისთვის და რამდენად არის ამის შესაძლებლობა.

ასევე, ერთ-ერთი დიდი გამოწვევა არის ლარის თემა ჯამში ინვესტორებისთვის, იმიტომ, რომ გვჭირდება სტაბილური ლარი იმისთვის, რომ ინვესტიციები განახორციელონ ქვეყანაში. ამასთან დაკავშირებით რა პოლიტიკა გვექნება, იმიტომ, რომ დინამიკა საკმაოდ რთულია. მესმის აბსოლუტურად, რატომაც, მაგრამ როგორ ვმოქმედებთ ჯამში და რას ვაპირებთ, იმიტომ, რომ ეს ერთ-ერთი დიდი კითხვის ნიშანია ინვესტორებისთვის“, - განაცხადა დავით სონღულაშვილმა.