ENKA-ს მთავრობასთან ურთიერთობის ხელმძღვანელი: ნამახვანჰესის პროექტს ხელს უშლიან აქტივისტთა კონკრეტული ჯგუფები

ჩვენი დაკვირვებით, თამამად შეგვიძლია ვთქვათ, რომ „ნამახვანჰესის“ პროექტის განხორციელებას ხელს უშლიან აქტივისტთა კონკრეტული ჯგუფები, - ამის შესახებ ENKA-ს მთავრობასთან ურთიერთობის ხელმძღვანელმა, ელენე ღუბიანურმა „დღის ქრონიკაში“ განაცხადა.

„როდესაც ხდება გაჟღერება, რომ პროექტს ადგილობრივი მოსახლეობა ეწინააღმდეგება, ამას ვერ დავეთანხმები იქიდან გამომდინარე, რომ ის მასშტაბური აქცია, რომელიც დაფიქსირდა ოქტომბრის ბოლოს საკმაოდ მოცულობითი იყო, სადაც რეგიონის მხოლოდ რამდენიმე მცხოვრების იდენტიფიცირება გახდა შესაძლებელი. იქ ფიქსირდებოდნენ გარკვეული პოლიტიკური ჯგუფების წარმომადგენლები, არასამთავრობო ორგანიზაციების აქტივისტები, ასევე აქციაზე იყვნენ ადამიანები, რომლებიც ამ რეგიონთან და არც მშენებარე ობიექტთან კავშირი არ აქვთ“, - აღნიშნა ღუბიანურმა.

მისი თქმით, ინვესტორი კომპანია შეეცადა აქციის მონაწილეებთან კონსტრუქციული დიალოგი გაემართა, თუმცა მათი მოთხოვნა ატარებდა ულტიმატუმის ხასიათს. „არ იყო მზაობა, რომ ერთმანეთთან ინფორმაცია გაგვეცვალა. გვსურდა მოგვესმინა რა აწუხებდათ მათ და რა ინფორმაცია გვქონდა ჩვენ კონკრეტულ ნებართვებზე. ვინაიდან კომპანიას ყველა დოკუმენტი წესრიგში აქვს. მათი მოთხოვნა იყო, რომ კომპანიამ აუცილებლად უნდა დატოვოს საქართველო და ეს პროექტი აუცილებლად უნდა შეწყდეს“, - განაცხადა ENKA-ს წარმომადგენელმა.

მისი თქმით, ანალოგიური წინააღმდეგობა ჩნდება სხვა ჰესების პროექტების შემთხვევაშიც, სადაც საპროტესტო აქციებზე იგივე სახეები ჩნდებიან.

ნამახვანის ჰესების კასკადის პროექტი 800 მილიონ აშშ დოლარამდე მოცულობის პირდაპირი უცხოური ინვესტიციით ხორციელდება. მისი ძირითადი ინვესტორი და 90%-იანი წილის მფლობელი 63-წლიანი ისტორიის მქონე კორპორაცია ENKA-ა (ENKA İnşaat ve Sanayi A.Ş.). ის ძირითადად ინჟინერიის, მშენებლობისა და ენერგეტიკის დარგებში ოპერირებს და ამჟამად მსოფლიოს 64 ქვეყანაში 20,000-ზე მეტ ადამიანს ასაქმებს.