ბექა ფერაძის თქმით, რესტორნების აბსოლუტური უმრავლესობა ეტაპობრივი გახსნის პროცესს მიჰყვება

ბექა ფერაძე იმედს გამოთქვამს, რომ რესტორნების მფლობელები კანონს არ დაარღვევენ და თვითნებურად არ გაიხსნებიან. ამის შესახებ შრომის პირობების ინსპექტირების დეპარტამენტის უფროსმა, ბექა ფერაძემ საკოორდინაციო საბჭოს სხდომის შემდეგ გამართულ ბრიფინგზე განაცხადა. მან ხაზი გაუსვა, რომ მთავრობა ბიზნესთან აქტიურ კომუნიკაციას აწარმოებს.

„მაქვს იმედი, რომ კვირის განმავლობაში კონსენსუსამდე მივალთ და ასეთი რადიკალური ზომები არ იქნება განხორციელებული მათი მხრიდან, ვინაიდან ამის საფუძველი, ბუნებრივია, არ არსებობს. თუ ამის უკიდურესი აუცილებლობა დადგება, და მაქვს იმედი, რომ ამ დონეზე არ მივა ჩვენი ურთიერთობა, სანქციებს გამოვიყენებთ - ფიზიკური პირის 2 ათასი ლარის ოდენობით, იურიდიული პირის მიმართ 10 ათასი ლარის ოდენობით და უკვე განმეორება იწვევს სისხლის სამართლებრივ პასუხისმგებლობას, რაც ასევე იწვევს დალუქვას და კანონით გათვალისწინებულ სხვა მოქმედებებს მსგავსი ობიექტების მიმართ“, - განაცხადა ფერაძემ.

მისივე თქმით, რესტორნების აბსოლუტური უმრავლესობა მთავრობის მიერ დაანონსებულ ეტაპობრივი გახსნის პროცესს მიჰყვება.

გავრცელებული ინფორმაციით, რესტორნები შაბათს თვითნებურ გახსნას გეგმავენ.