ანდრია გვიდიანი: Fitch-ის მიერ საკრედიტო რეიტინგის უცვლელად დატოვება ეკონომიკის პოზიტიურ პერსპექტივებზე მიანიშნებს

საერთაშორისო სარეიტინგო სააგენტო Fitch-მა საქართველოს სუვერენული საკრედიტო რეიტინგი BB დონეზე, ხოლო პერსპექტივა ნეგატიურ დონეზე უცვლელი დატოვა. რეიტინგის უცვლელად დატოვებასთან დაკავშირებით, ეკონომისტი ანდრია გვიდიანი მიიჩნევს, რომ ეს ფაქტორი ეკონომიკის სამომავლო პერსპექტივებთან მიმართებით პოზიტიურ მოლოდინებს აჩენს.

„სუვერენული საკრედიტო რეიტინგი არის ეკონომიკის ერთ-ერთი ყველაზე ღრმა შეფასება. სარეიტინგო კომპანიები ძალიან ბევრი ფაქტორის გათვალისწინებით ადგენენ ქვეყნების სარეიტინგო ქულას. შესაბამისად, მთელი რიგი მაკროეკონომიკური პარამეტრების შეფასების და ამავე დროს პროგნოზების მოდელირების საფუძველზე ხდება სარეიტინგო ქულის მინიჭება. დღეს გამოქვეყნებული სარეიტინგო ქულის მიხედვით, შეგვიძლია ვთქვათ, რომ მსოფლიოს უმსხვილეს სარეიტინგო კომპანიას ქვეყნის ეკონომიკის პერსპექტივაზე პოზიტიური მოლოდინები აქვს. კერძოდ, fitch-ის ანგარიშში აღნიშნულია, რომ საქართველოს ეკონომიკა 2021 წელს 4.3 პროცენტით, ხოლო 2022 წელს 5.8 პროცენტით გაიზრდება. გარდა ამისა, ხაზგასმულია, რომ საქართველოს ეკონომიკის გაჯანსაღების ტემპი BB კატეგორიის ქვეყნების მედიანურ მაჩვენებელთან შედარებით მაღალი იქნება. ანგარიშში, ასევე პოზიტიურად არის შეფასებული როგორც მონეტარული, ისე ფისკალური ხელისუფლების მიერ მიღებული გადაწყვეტილებები. ცხადია, ასეთი აღიარება აჩენს ქვეყნის ფინანსური ინსტიტუტების მიმართ ნდობას როგორც ადგილობრივი, ისე უცხოელი ინვესტორებისთვის. აქედან გამომდინარე ვთვლი, რომ fitch-ის ანგარიში ბევრი პოზიტიური შეფასებით არის დატვირთული“, - განაცხადა გვიდიანმა.

სარეიტინგო კომპანიის ანგარიშში ასევე ყურადღება გამახვილებულია ქვეყნის პოლიტიკურ რეალობაზე. კერძოდ, აღნიშნულია, რომ საპარლამენტო არჩევნებში, „ქართული ოცნების“ ხელახალი არჩევა აძლიერებს სარეიტინგო კომპანიის მოლოდინებს ეკონომიკური პოლიტიკისა და რეფორმების გატარების უწყვეტობის შესახებ. აღნიშნულ საკითხთან დაკავშირებით, ანდრია გვიდიანი მიიჩნევს რომ ეს ჩანაწერი მისთვის მოულოდნელობა არ ყოფილა.

„ქართული ოცნების“ ხელისუფლების მიმართ უამრავი საერთაშორისო ორგანიზაციის მხრიდან არაერთხელ არის დაფიქსირებული ნდობის მაღალი ხარისხი. მოქმედი ხელისუფლების პირობებში მიმდინარე ეკონომიკური რეფორმები როგორც წესი კარგად არის გააზრებული და მათ შორის ძირითადად შეთანხმებულია ხოლმე საერთაშორისო ფინანსურ ინსტიტუტებთან. ეკონომიკური გადაწყვეტილებები არ მიიღება გაუაზრებლად და ექსპერიმენტული სახით. შესაბამისად, fitch-ს მოქმედი ხელისუფლების მიმართ ამ ნაწილში სრული ნდობა აქვს გამოცხადებული და დარწმუნებულები არიან, რომ "ქართული ოცნების" ხელახალი არჩევა დაკავშირებულის სტაბილურობის მაღალ ხარისხთან“, - აღნიშნა გვიდიანმა.