ლაშა ხუციშვილი: განახლებული პროგნოზის შესაბამისად, 2021 წელს ეკონომიკური ზრდა ნავარაუდევია 6,5%-ით, რაც გაცილებით მაღალი მაჩვენებელია, ვიდრე წინა პროგნოზებში

ლაშა ხუციშვილმა მინისტრთა კაბინეტის წევრებს განახლებული მაკროეკონომიკური პროგნოზი წარუდგინა. მთავრობის სხდომაზე ფინანსთა მინისტრმა აღნიშნა, რომ ბოლო პერიოდში ძალიან ოპტიმისტური დინამიკა ფიქსირდება, რაც ჯერ კიდევ მარტში გამოჩნდა, როდესაც პანდემიის დაწყებიდან პირველად ეკონომიკის 4%-იანი ზრდა დაფიქსირდა.

„პროგნოზებს წარვადგენთ სამი სცენარით: საბაზისო, ოპტიმისტური და პესიმისტური სცენარები. ამჟამად, ჩვენი წინა პროგნოზი უკვე რჩება პესიმისტურ სცენარში. რაც შეეხება საბაზისო, ანუ მთავარ სცენარს, ჩვენი განახლებული პროგნოზის შესაბამისად, ეკონომიკური ზრდა 2021 წელს ნავარაუდევია 6,5%-ით, რაც არის გაცილებით მაღალი, ვიდრე ეს იყო წინა პროგნოზებში. აქვე აღვნიშნავ, რომ მნიშვნელოვანია ისიც, რომ ნავარაუდევი პროგნოზი 2022 წლისთვის ასევე მაღალია, ეს არსი 6,9%. მაღალი ეკონომიკური ზრდის ფონზე, ბუნებრივია, შევამცირებთ საბიუჯეტო დეფიციტს 7,1%-მდე ადრე არსებული 7,6%-დან და ეს ეს ძალიან მნიშვნელოვანი განაცხადია მაკროეკონომიკური სტაბილურობის მიმართულებით“, - განაცხადა მინისტრმა.

მისივე განმარტებით, პროგნოზების ოპტიმისტური სცენარით, 2021 წელს ეკონომიკური ზრდა ორნიშნა იქნება და სავსებით შესაძლებელია, რომ ეკონომიკური აქტივობა სწორედ ამ სცენარით განვითარდეს.

„ოპტიმისტურ სცენარში ნავარაუდევია, რომ 2021 წლის ეკონომიკური ზრდა შეადგენს 10,2%-ს და აღნიშნული სცენარი ითვალისწინებს მიმდინარე წელს ტურიზმის სფეროს სწრაფ აღდგენას. კონკრეტულად, 2019 წლის 40-45%-ის დონეზე, რაც სავსებით რეალურია. ის ასევე ითვალისწინებს ეკონომიკის დინამიკის ზრდას სხვა სექტორებში. ამის აშკარა ნიშნები უკვე დავინახეთ აპრილის თვის მონაცემებით, როდესაც დაფიქსირდა თითქმის 45%-იანი ზრდა. აღსანიშნავია ისიც, რომ აღნიშნული ზრდა გადანაწილდა პრაქტიკულად ყველა სექტორზე. ბუნებრივია, განახლებული პროგნოზები ითვალისწინებს პოზიტიურ ცვლილებებს ეკონომიკის პრაქტიკულად ყველა მნიშვნელოვანი მაჩვენებლების მიმართულებით. ეს არის მიმდინარე ანგარიშის დეფიციტი, რომელიც გაუმჯობესდება, ასევე მთავრობის ვალის შემცირების დინამიკა კიდევ უფრო სწრაფი იქნება. სწორედ აღნიშნული პროგნოზებზე დაყრდნობით დაიწყება ბიუჯეტში ცვლილებების პროექტისთვის მზადება“, - განმარტა ხუციშვილმა.

საქსტატის მონაცემებით, 2021 წლის აპრილში, წინა წლის შესაბამის პერიოდთან შედარებით, ეკონომიკა 44.8 %-ით გაიზარდა.