ლაშა ხუციშვილი: მომდევნო წლებში კიდევ უფრო გაუმჯობესდება საჯარო ფინანსების მართვის საერთაშორისო ინდიკატორები

ფინანსთა მინისტრმა, ლაშა ხუციშვილმა საჯარო ფინანსების აღრიცხვიანობის, ანგარიშვალდებულებისა და გამჭვირვალობის მნიშვნელობაზე, 10-წლიანი გეგმის წარდგენისას ისაუბრა.

მისი თქმით, აღრიცხვიანობის და ანგარიშვალდებულების შეფასების საუკეთესო მოდელად აღიარებულია მსოფლიო ბანკის მიერ შემუშავებული სახელმწიფო ხარჯების და ფინანსური ანგარიშვალდებულების - ე.წ. PEFA-ს შეფასება, რომელიც ყოველ 4 წელიწადში ერთხელ ხორციელდება; განხორციელებული რეფორმების შედეგად, აღნიშნული შეფასების ინდიკატორების 81 პროცენტში საქართველოს კარგი ან უმაღლესი შეფასება აქვს.

ჩვენ ვაგრძელებთ რეფორმებს თითოეული მიმართულებით და სამიზნე მაჩვენებლად დასახული გვაქვს კარგი ან უმაღლესი შეფასება გვქონდეს: 2026 წელს - ინდიკატორების 90 პროცენტში, 2030 წელს - ინდიკატორების 95 პროცენტში“, - აღნიშნა ფინანსთა მინისტრმა, ლაშა ხუციშვილმა.

რაც შეეხება ბიუჯეტის გამჭვირვალობას, ამ მხრივ ყველაზე მნიშვნელოვნია ბიუჯეტის ღიაობის ინდექსი რომლის მიხედვით საქართველო იმყოფება სრულიად გამჭვირვალე სტატუსის მქონე 6 ქვეყანას შორის.

„მომდევნო წლებში, ჩვენ მიერ დაგეგმილი ღონისძიებები მიმართულია გამჭვირვალობის სტანდარტების კიდევ უფრო ამაღლებისკენ და რაც მნიშვნელოვანია, საბიუჯეტო პროცესში მოსახლეობისა და არასამთავრობო სექტორის მეტი ჩართულობის მიღწევისკენ. შედეგად ჩვენ მუდმივად შევინარჩუნებთ სრულიად გამჭვირვალე ქვეყნის სტატუსს“, - განაცხადა ფინანსთა მინისტრმა, ლაშა ხუციშვილმა.

მისი თქმით, ქვეყანას მაღალი შეფასებები აქვს საგადასახადო ადმინისტრირების მიმართულებით.

„საგადასახადო ორგანოების ეფექტურობა 4 წელიწადში ერთხელ საერთაშორისო სავალუტო ფონდის მიერ ფასდება, საგადასახადო ადმინისტრირების დიაგნოსტიკის ინსტრუმენტის - ე.წ. TADAT-ის მიხედვით. ინდიკატორების 53 პროცენტში ქვეყანას აქვს კარგი ან უმაღლესი შეფასება. ამ ეტაპზე, საერთაშორისო სავალუტო ფონდთან ერთად მიმდინარეობს მომდევნო 4-წლიანი სტრატეგიის შემუშავება, რომლის მიხედვითაც განახლდება ჩვენი რეფორმების სია. რეფორმების განხორციელების შედეგად, სამიზნე მაჩვენებლად დასახული გვაქვს TADAT-ის მიხედვით კარგი ან უმაღლესი შეფასება გვქონდეს: 2024 წელს - ინდიკატორების 70 პროცენტში, 2028 წელს - ინდიკატორების 90 პროცენტში“, - განაცხადა ფინანსთა მინისტრმა, ლაშა ხუციშვილმა.