ირაკლი ნადარეიშვილი: სააგენტო „აწარმოე საქართველოში“ მუდმივ რეჟიმში მუშაობს ბიზნესპროცესებისა და კონტროლის მექანიზმების დახვეწასა და გაუმჯობესებაზე

„სააგენტო „აწარმოე საქართველოში“ მუდმივ რეჟიმში მუშაობს ბიზნეს პროცესების და კონტროლის მექანიზმების დახვეწასა და გაუმჯობესებაზე. ნებისმიერ უწყებასა თუ ორგანიზაციაში ამ კუთხით მიმართული ღონისძიებები ერთ-ერთი უმნიშვნელოვანესი პროცესია, რომელმაც საბოლოო ჯამში, უნდა უზრუნველყოს მისი საქმიანობის ეფექტურობის ზრდა“, - აცხადებს ეკონომიკისა და განვითარების მინისტრის მოადგილე ირაკლი ნადარეიშვილი სახელმწიფო აუდიტის სამსახურის მიერ 2017-2019 წლებში გაცემული გრანტების აუდიტის ანგარიშში სააგენტო „აწარმოე საქართველოში“ შესახებ არსებული ინფორმაციის კომენტირებისას.

„სწორედ ამ პრინციპით მუშაობს და ვითარდება „აწარმოე საქართველოში“ - პროგრამების მიმდინარეობის პროცესში, არსებული ხარვეზების აღმოფხვრის მიზნით, 2019 წლის ბოლოდან დღემდე ,ეკონომიკისა და მდგრადი განვითარების სამინისტროს მიერ ღონისძიებების მთელი რიგი გატარდა, მათ შორის ანგარიშში მოხვედრილი პროგრამების მიმართებით, რომელთა შედეგადაც, გაუმჯობესდა პროგრამების მიზნობრიობა, ასევე დაინერგა კონტროლისა და ანალიზის ახალი მექანიზმების მთელი რიგი“, - აღნიშნავს ირაკლი ნადარეიშვილი.

ამასთან, მისი განცხადებით, სააგენტოს ეფექტური საქმიანობის ერთ-ერთი მაჩვენებელია ისიც, რომ 2021 წელს ის გახდა მსოფლიო ბანკის „მიკრო, მცირე და საშუალო საწარმოების დახმარებისა და აღდგენის“ 5-წლიანი პროგრამის ერთ-ერთი ძირითადი განმახორციელებელი საქართველოში. აღნიშნულის შესახებ 85 მილიონი ევროს მოცულობის ხელშეკრულება გაფორმდა მიმდინარე წლის მაისში, თუმცა ამას წინ უძღოდა ბანკის მხრიდან „აწარმოე საქართველოს “ყველა ძირითადი პროგრამის დეტალური შესწავლა, როგორც მათი მართვის ასევე მიზნობრიობისა და ეფექტურობის თვალსაზრისით.

„მსოფლიო ბანკის „აწარმოე საქართველოში“ შემოსვლა ძალიან მკაფიო ინდიკატორია იმისა, რომ სააგენტო, პარტნიორ ბანკებთან ერთად, ეფექტიანად მართავს პროგრამულ პორტფელებს და უზრუნველყოფს ბიზნესპროცესების გამჭვირვალობასა და მსოფლიო ბანკის საკმაოდ მაღალ სტანდარტებთან შესაბამისობას“, - აღნიშნავს ირაკლი ნადარეიშვილი.

ეკონომიკის მინისტრის მოადგილის ინფორმაციით, 2020 წლიდან, მნიშვნელოვნად გაფართოვდა როგორც არსებული, ასევე ამოქმედდა კოვიდპანდემით განპირობებული ანტიკრიზისული მიზნობრივი პროგრამების მთელი რიგი. აღნიშნულმა ტრანსფორმაციამ დღის წესრიგში დააყენა გარკვეული სისტემური ცვლილებები, რომლებიც დღესაც წარმატებით ხორციელდება.

მინისტრის მოადგილე ხაზგასმით აღნიშნავს, რომ ამ ცვლილებების განხორციელებისას, იდენტიფიცირებული და გათვალისწინებულია თითქმის ყველა რეკომენდაცია, რომლებიც 2017-2019 წლის სახელმწიფო აუდიტის ანგარიშში მოხვდა.

რაც შეეხება უშუალოდ 2017-2019 წლის ანგარიშის რეკომენდაციებს - ეკონომიკის მინისტრის მოადგილის ინფორმაციით, სააგენტოს პარტნიორი კომერციული ბანკები და სალიზინგო კომპანიები სესხების მიზნობრიობას დეტალურად აკონტროლებენ და არც ერთ შესწავლილ შემთხვევაში, მიზნობრიობის დარღვევის ფაქტი არ გამოვლენილა.

ასევე, ლიზინგის შემთხვევაში, საკითხი ეხებოდა კანონმდებლობაში არსებულ ბუნდოვანებას, რის საპასუხოდაც, 2019 წლის შემდგომ პერიოდში, უკვე დაიხვეწა შესაბამისი კანონმდებლობა.

„ამასთან, მნიშვნელოვანია, რომ 2019 წლის ოქტომბერში, სააგენტოში შეიქმნა „ანალიზის, მონიტორინგისა და შეფასების დეპარტამენტი“, რომლის ფუნქციებსაც სწორედ მსგავსი რისკების იდენტიფიცირება და შესაბამისი რეაგირების უზრუნველყოფა წარმოადგენს. სამომავლოდ, ყოველგვარი შესაძლო რისკის თავიდან აცილების მიზნით, სააგენტოში უკვე დანერგილია პროტოკოლი, რომლის მიხედვითაც ხორციელდება სესხების მიზნობრიობის დამატებითი მონიტორინგი“, - აცხადებს ეკონომიკის მინისტრის მოადგილე.

ნადარეიშვილის თქმით, აღსანიშნავია ცალსახად პოზიტიური როლი, რომელსაც პროგრამა „აწარმოე საქართველოში“ წლების განმავლობაში, მისი დაარსების დღიდან ასრულებს ქართული ბიზნესის ხელშეწყობის მიმართულებით.

„მაგალითისთვის, სესხის სუბსიდირების პროგრამა 2014 წლიდან მოქმედებს და მის ფარგლებში, ერთმა სუბსიდირებულმა ლარმა სტიმული მისცა 15.7 ლარის კერძო ინვესტიციას, 5.04 ლარი დააგენერირა გადახდილი გადასახადების სახით და შექმნა 8.7 ლარის მთლიანი შიდა პროდუქტი“, - განაცხადა ეკონომიკის მინისტრის მოადგილემ.