ირაკლი ნადარეიშვილი: წყალტუბოს გააჩნია ყველა წინაპირობა, რომ საქართველოს ტურისტული დანიშნულების ადგილებს შორის წამყვანი ადგილი დაიკავოს

„წყალტუბოს გააჩნია ყველა წინაპირობა და უდიდესი პოტენციალი, რომ წამყვანი ადგილი დაიკავოს საქართველოს ტურისტული დანიშნულების ადგილებს შორის,“ - განაცხადა ეკონომიკისა და მდგრადი განვითარების მინისტრის მოადგილემ, ირაკლი ნადარეიშვილმა წყალტუბოს გენგეგმის კონცეფციის საკონკურსო ხედვის პრეზენტაციის შემდეგ.

მინისტრის მოადგილის განცხადებით, ძალიან მნიშვნელოვანია, რომ ესოდენ მასშტაბური პროექტის განხორციელება მოხდეს თანმიმდევრულად, და გეგმაზომიერად, რათა მინიმუმამდე იქნას დაყვანილი ყველანაირი შეცდომა. მისი თქმით, ამ პროცესში დიდი როლი აქვს საჯაროობას, როგორც ბიზნესის, ასევე ადგილობრივი მოსახლეობასთან მიმართებაში.

„ეს პროცესი გაგრძელდება და მისი ყველა ეტაპი იქნება გამჭვირვალე. ყველა ეტაპზე იქნება ჩართული როგორც ბიზნესი, ასევე მოსახლეობა, რომელიც საბოლოო ჯამში ყველა იმ სიკეთის და ეკონომიკური დოვლათის ბენეფიციარია, რომელსაც მოიტანს რეაბილიტირებული წყალტუბო საქართველოსთვის,”-აღნიშნა ირაკლი ნადარეიშვილმა.

მინისტრის მოადგილის განცხადებით, ტურიზმის განვითარება და აღდგენა განსაკუთრებულ მნიშვნელობას იძენს პოსტ-კოვიდის პერიოდში. მისი თქმით, მნიშვნელოვანია ტურიზმის არა მხოლოდ რაოდენობრივი აღდგენა, არამედ ხარისხობრივი გაუმჯობესება, რაც გულისხმობს ახალი სერვისების შეთავაზებას და უფრო მაღალმხარჯველიანი ტურისტების მოზიდვას საქართველოში.

დღეს წყალტუბოში კურორტის გენგეგმის კონცეფციის საკონკურსო წინადადებების საჯარო პრეზენტაცია გაიმართა.

საკონკურსო კონცეფციები საზოგადოებას გააცნეს წყალტუბოს განვითარებისათვის ქალაქთმშენებლობითი დოკუმენტაციის შემუშავებაზე გამოცხადებული კონკურსის მონაწილე კომპანიების წარმომადგენლებმა.

ინფრასტრუქტურის სამინისტროს მიერ სექტემბერში გამოცხადებულ კონკურსში წინადადებები სამმა კომპანიამ - შპს „ბაუ დიზაინმა“, შპს „დისტანციური ზონდირებისა და გეოინფორმაციული სისტემების საკონსულტაციო ცენტრი გეორგაფიკმა“ და შპს „არტსტუდიო-პროექტმა“ წარადგინა.