ირაკლი ღარიბაშვილი: დღეს გამოქვეყნდა აგვისტოს თვის ეკონომიკური მაჩვენებელი - 10,3%, რაც იანვარ-აგვისტოს პერიოდში 12%-იან ზრდას ნიშნავს, ეს უპრეცედენტო მაჩვენებელია მთელ რეგიონში

დღეს გამოქვეყნდა აგვისტოს თვის ეკონომიკური მაჩვენებელი - 10,3%. ეს ჯამში იანვარ-აგვისტოს პერიოდში 12%-იან ზრდას ნიშნავს, ეს არის უპრეცედენტო მაჩვენებელი მთელ რეგიონში, - ამის შესახებ პრემიერ-მინისტრმა, ირაკლი ღარიბაშვილმა განაცხადა.

„დღეს წარმოვადგინეთ ერთგვარი შეჯამება იმ თანადაფინანსებული პროექტებისა, რომლებიც სახელმწიფომ ბიზნესთან ერთად განახორციელა. 2013 წლიდან დავიწყეთ ძალიან მნიშვნელოვანი პროგრამების განხორციელება, ესენია „შეღავათიანი აგროკრედიტი“, „აწარმოე საქართველოში“, „დანერგე მომავალი“ და ა.შ. საერთო ჯამში, 1 800-ზე მეტი პროექტი დავაფინანსეთ და აქ შედის საწარმოები, გადამამუშავებელი მეურნეობები და უამრავი პროექტი, რომელიც დაფინანსდა სახელმწიფოს ხელშეწყობით. ჯამში, მხოლოდ სოფლის მეურნეობის მიმართულებით, ინვესტირებულია 4 მლრდ ლარი, აქედან 800 მილიონი არის მთავრობის თანადაფინანსება. რაც შეეხება პროგრამას „აწარმოე საქართველოში“, აქ 1,8 მილიარდია ინვესტირებული, საიდანაც 190 მილიონი არის ჩვენი თანადაფინანსება. ჯამში, შეიქმნა 53 ათასი ახალი სამუშაო ადგილი. რა თქმა უნდა, ეს ყველაფერი ეხმარება იმას, რომ ეტაპობრივად მეტი სამუშაო ადგილი შევქმნათ, დავძლიოთ სიღარიბე და მეტი ადამიანი გამოვიდეს გაჭირვებიდან. მინდა გითხრათ, რომ ჩვენ გვაქვს კიდევ უფრო მეტად ამბიციური გეგმები. 2022 წლიდან ვიწყებთ უფრო მასშტაბური პროგრამების განხორციელებას, 2,5 მილიარდი ლარის ინვესტირებას ადგილობრივი წარმოების განვითარების მიმართულებით, სოფლის მეურნეობაში მომდევნო წლების განმავლობაში 7 მლრდ ლარი იქნება ინვესტირებული. ჩვენი მიზანია, რომ ქვეყანაში თვითუზრუნველყოფის დონე გაიზარდოს, რათა არ ვიყოთ მხოლოდ იმპორტზე დამოკიდებულები. საბოლოო ჯამში, მომდევნო წლებში ჩვენი ეკონომიკა უნდა გავაორმაგოთ. ასევე გეტყვით, რომ დღეს გამოქვეყნდა აგვისტოს თვის ეკონომიკური მაჩვენებელი - 10,3%. ეს ჯამში იანვარ-აგვისტოს პერიოდში 12%-იან ზრდას ნიშნავს, ეს არის უპრეცედენტო მაჩვენებელი მთელ რეგიონში“, - განაცხადა ღარიბაშვილმა.