გიორგი ცუცქირიძე: ეკონომიკური ზრდის მაჩვენებლით არა თუ რეგიონში ან ევროპაში ვართ პირველ ადგილზე, ინფლაციის დაწევის დონითაც ვლიდერობთ

„მაღალი ეკონომიკური ზრდის პირობებში, რაც ლარის გაცვლითი კურსის გამყარებით მიმდინარეობს, გაზრდილი ადგილობრივი ექსპორტის, საერთაშორისო ტურიზმისა და პირდაპირი უცხოური ინვესტიციების ფონზე, დღეს მთავარი გამოწვევა მაინც ინფლაცია და გაზრდილი ფასებია“, - ამის შესახებ ექსპერტი გიორგი ცუცქირიძე სოციალურ ქსელში წერს.

როგორც ექსპერტი აღნიშნავს, 2022 წლის ივლისში, წლიური ინფლაციის დონემ 11.5% შეადგინა, წლიური ინფლაციის დონე კი, წინა თვესთან შედარებით, 1.3 პროცენტული პუნქტით შემცირდა.

„არაერთხელ აღმინიშნავს, რომ რუსეთ-უკრაინის ომმა ჯერ კიდევ პოსტპანდემიური აღდგენის პროცესში მყოფი მსოფლიო ეკონომიკა ახალი გამოწვევების წინაშე დააყენა. ომის შედეგად წნეხი ინფლაციაზე გაიზარდა. სანქციების და მიწოდების ჯაჭვების რღვევის ფონზე ნავთობის ფასები ივლისში 46%-ით გაიზარდა წინა წელთან შედარებით. ამასთან, 2022 წლის ივნისში FAO-ს სასურსათო პროდუქციის ფასების ინდექსი 23.1%-ით გაიზარდა.

გამომდინარე იქიდან, რომ ჩვენთან მაღალი ინფლაცია დიდწილად ეგზოგენურ ფაქტორს წარმოადგენს, ლარის გამყარების დადებითი ეფექტი ინფლაციაზე აისახა და იმპორტირებული საქონლის ინფლაციის შენელებას შეუწყო ხელი.

ნიშანდობლივია, რომ თუ წლის პირველ კვარტალში ზრდის სარეკორდო 14.9 პროცენტიანი მაჩვენებლით, ასევე, პირველ 6 თვეში ეკონომიკური ზრდის 11.2 პროცენტიანი მაჩვენებლით არა თუ რეგიონში, ან ევროპაში ვართ პირველ ადგილზე, არამედ მსოფლიოში წამყვანი 5 ქვეყანას შორისაც ვიმყოფებით, ინფლაციის დაწების დონითაც ვლიდერობთ და დადებით ტენდენციას ვინარჩუნებთ.

მაშინ, როდესაც ინფლაციამ არაერთ ქვეყანაში არამხოლოდ პროგნოზირებულს გადააჭარბა, არამედ ბოლო წლების და უმეტეს შემთხვევებში ათწლეულების რეკორდულ დონეს მიაღწია.

აქვე უნდა აღინიშნოს, რომ 2022 წლის ივნისში თურქეთში ინფლაცია 78.6% იყო, რუსეთში 15.9%, უკრაინაში 21.5%, სომხეთში 10.3%, აზერბაიჯანში 14.2%, ბელარუსში 17.6%, მოლდოვაში 31.8% და ესტონეთში 21.9% იყო. ევროკავშირის ქვეყნებში ინფლაცია 15- 20%-ის ფარგლებშია, ამერიკაში რეკორდულია 9%, ბრიტანეთში 9,4%, რაც არ ყოფილა ბოლო 40 წლის განმავლობაში.

მიმაჩნია, რომ, სხვა თანაბარ პირობებში, ეკონომიკური ზრდა წლის ბოლოს მაღალ ორნიშნა ნიშნულთან იქნება, ინფლაციაც შემცირების ტენდენციებს შეინარჩუნებს, საგარეო ფაქტორების მილევის შედეგად და გამკაცრებული მონეტარული პოლიტიკის პირობებში, თუმცა ბუნებრივია, წლის განმავლობაში მიზნობრივ მაჩვენებელზე მაღლა შენარჩუნდება“, - აღნიშნავს გიორგი ცუცქირიძე.