ირაკლი ღარიბაშვილი: „ნაციონალური მოძრაობის“ მმართველობის დროს ჩვენი ქვეყნის ეკონომიკა დაახლოებით 27 მილიარდი ლარი იყო, დღეს 80 მილიარდია

„ნაციონალური მოძრაობის“ მმართველობის დროს ჩვენი ქვეყნის ეკონომიკა დაახლოებით 27 მილიარდი ლარი იყო. 80 მილიარდი არის ჩვენ ქვეყნის ეკონომიკა და ბოლო 2 წლის განმავლობაში 30 მილიარდით გავზარდეთ. ეს არის პასუხი და ფაქტი, - ამის შესახებ ირაკლი ღარიბაშვილმა ჟურნალისტებთან საუბრისას განაცხადა.

გარდა ამისა, პრემიერის თქმით, თითქმის 80 ათასი სამუშაო ადგილი შეიქმნა, ტენდენცია უმჯობესდება, სიღარიბე და უმუშევრობა შემცირებულია და კიდევ უფრო მეტი აქტივობაა საჭირო“, - განაცხადა პრემიერმა.

პრემიერმა ასევე აღნიშნა, რომ ინფლაცია მთლი მსოფლიოსთვის არის გამოწვევა.

„ინფლაცია არის მთელი მსოფლიოსთვის გამოწვევა. ეს გამოიწვია პირველ რიგში, პანდემიამ, მაშინ მკაცრი ლოქდაუნი იყო თითქმის მთელ მსოფლიოში. ამას დაემატა ომი, რაც მიმდინარეობს უკრაინაში. რამდენიმე დღის წინ გამოქვეყნდა მთელი ევროზონის ინფლაციის მაჩვენებელი - საშუალო მაჩვენებელი არის უკვე ორნიშნა ინფლაცია, 11%-ია, თუ არ ვცდები. ევროკავშირში, რომელიც ერთ-ერთი მთავარი ბაზარი, მთავარი ეკონომიკაა მსოფლიოში. ევროპის წამყვან სახელმწიფოებში, მათ შორის, გერმანიაში, საფრანგეთში, ბალტიისპირეთში, აღმოსავლეთ ევროპის ქვეყნებში. ზოგიერთ ქვეყნებში 20%-ს ასცდა ინფლაცია, ზოგან არის 25%, ევროპის სახელმწიფოებში მეგობრებო, ეს კარგად უნდა გავითვალისწინოთ. მთავარი განსხვავება, რაც ჩვენ გვაქვს, რომ იქ, ჩვენგან განსხვავებით არის ეკონომიკის შემცირება, რეცესია. ჩვენ გვაქვს ორნიშნა ეკონომიკური ზრდა, რაც აბალანსებს ამ გამოწვევას“, - აღნიშნა ღარიბაშვილმა.