ექსპორტის ზრდის ტენდენცია ნარჩუნდება

საქსტატის მონაცემებით, იანვარ-აგვისტოში საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 6618.2 მლნ. აშშ დოლარი შეადგინა, რაც წინა წლის შესაბამის მაჩვენებელზე 12.2 %-ით მეტია; აქედან ექსპორტი 1682.8 მლნ. აშშ დოლარს შეადგენს (28.5 %-ით მეტი), ხოლო იმპორტი 4935.5 მლნ. აშშ დოლარს (7.5 %-ით მეტი).

საქართველოს უარყოფითმა სავაჭრო ბალანსმა 2017 წლის იანვარ-აგვისტოში 3252.7 მლნ. აშშ დოლარი და საგარეო სავაჭრო ბრუნვის 49.1 % შეადგინა. ამავე პერიოდში ექსპორტი რეექსპორტის გარეშე 1322.1 მლნ. აშშ დოლარი იყო, რაც 27 %-ით აღემატება წინა წლის შესაბამისი პერიოდის მაჩვენებელს.

"საქსტატის" ცნობით, 8 თვეში საგარეო სავაჭრო ბრუნვა ევროკავშირის ქვეყნებთან 1.804 მლრდ აშშ დოლარია, რაც წინა წლის შესაბამისი პერიოდის მაჩვენებელზე 7.4 %-ით მეტია. 400.9 მლნ დოლარამდეა გაზრდილი ექსპორტი, ხოლო იმპორტი 1.403 მლრდ დოლარია, საქართველოს საგარეო სავაჭრო ბრუნვაში ამ ქვეყნების წილმა 27.3 პროცენტი შეადგინა.

რაც შეეხება დსთ-ის ქვეყნებს, მათზე ბრუნვის 31.9% მოდის. 8 თვეში სავაჭრო ბრუნვამ 2.110 მლრდ დოლარს გადააჭარბა, ზრდა 31%-ია.

ექსპორტი 674 მლნ. აშშ დოლარი (58.1 პროცენტით მეტი), ხოლო იმპორტი 1436.5 მლნ. აშშ დოლარი იყო (21.3 პროცენტით მეტი).