ფინანსთა სამინისტრომ ბიუჯეტის შესრულების 9 თვის ანგარიში წარადგინა

რეგიონული პოლიტიკისა და თვითმმართველობის კომიტეტის სხდომაზე 2017 წლის სახელმწიფო ბიუჯეტის 9 თვის შესრულების შესახებ ინფორმაცია ფინანსთა მინისტრის მოადგილემ გიორგი კაკაურიძემ წარადგინა.

კაკაურიძის თქმით, 2017 წლის პირველი ცხრა თვის მონაცემებით ეკონომიკურმა ზრდამ პროგნოზირებული 4%-ის ნაცვლად, 4.7% შეადგინა, მთლიანი შიდა პროდუქტის გაზრდილი მაჩვენებელი კი, ძირითადად ექსპორტიდან, ტურიზმიდან და ფულადი გზავნილებიდან მიღებულმა შემოსავლებმა განაპირობა. 

კაკაურიძემ გადასახადების, გრანტების და სხვა შემოსავლების მაჩვენებლებზეც ილაპარაკა და  მათი მონაცემები პროცენტებში წარმოადგინა.

კერძოდ, მიმდინარე წლის 9 თვეში შემოსულობები - 104.8%-ით, გადასახადების მობილიზება - 103.5%-ით, გრანტების მაჩვენებელი - 164.8%-ით და სხვა შემოსავლები 115%-ით შესრულდა.

რაც შეეხება ბიუჯეტის ათვისებას და მის ხარჯვით ნაწილს - ამ მიმართულებით შესრულების მაჩვენებელი 97.5%-ს შეადგენს. 

მიმდინარე წლის ცხრა თვის მონაცემებით, სახელმწიფო ბიუჯეტის ათვისების ნაწილში თავდაცვის სამინისტრომ - 92%, შინაგან საქმეთა სამინისტრომ - 99%, სახელმწიფო უსაფრთხოების სამსახურმა - 92% და დაზვერვის დეპარტამენტმა - 90.2% შეადგინა.