დღეს აბრეშუმის გზის ფორუმი გაიხსნება

28-29 ნოემბერს თბილისში აბრეშუმის გზის ფორუმი გაიმართება.

ეკონომიკის სამინისტროს ცნობით, 2017 წლის ფორუმი 2015 წლის თბილისის აბრეშუმის ფორუმის გაგრძელებაა და წარმოადგენს მაღალი დონის სამთავრობო და ბიზნესის ბიზნესთან დიალოგის და, ასევე, სახელმწიფოებს, ორგანიზაციებსა და ბიზნესებს შორის ორმხრივი და მრავალმხრივი შეხვედრების პლატფორმას.

2017 წლის აბრეშუმის გზის ფორუმს 34 ოფიციალური დელეგაცია და 60-ზე მეტი ქვეყნის 2000-მდე დელეგატი დაესწრება.

მასში მონაწილეობას მიიღებენ უკრაინის და მოლდოვის პრემიერმინისტრები, რამდენიმე ქვეყნის ვიცე პრემიერები, სხვა მაღალი თანამდებობის პირები, დიპლომატიური კორპუსების და საერთაშორისო ორგანიზაციების (ევროპის რეკონსტრუქციისა და განვითარების ბანკი, აზიის განვითარების ბანკი, მსოფლიო სავაჭრო ორგანიზაცია, სპარსეთის ყურის ქვეყნების თანამშრომლობის საბჭო, მსოფლიო საფოსტო კავშირი, რკინიგზის საერთაშორისო გადაზიდვის მთავრობათაშორისი ორგანიზაცია, მსოფლიო საბაჟო ორგანიზაცია, ტელეკომუნიკაციების განვითარების ბიურო და ა.შ.) წარმომადგენლები, ასევე საერთაშორისო რანგის ექსპერტები და ჟურნალისტები.

თბილისში აბრეშუმის გზის ფორუმში ასევე მონაწილეობას მიიღებენ როგორც ადგილობრივი, ისე უცხოელი ბიზნესმენები, კერძოდ, ბიზნესსექტორის 1100 წარმომადგენელი, მათ შორის 500-ზე მეტი უცხოური კომპანიის.

თბილისის აბრეშუმის გზის ფორუმი ხვალ 9.30 საათზე თბილისის ზაქარია ფალიაშვილის სახელობის ოპერისა და ბალეტის ეროვნულ თეატრში მისასალმებელი პანელით „მაღალი დონის დიალოგი: სარტყელი და გზის კავშირი სტაბილურობისათვის“გაიხსნება.

ღონისძიებას მისასალმებელი სიტყვით გახსნის საქართველოს პრემიერმინისტრი გიორგი კვირიკაშვილი.

აბრეშუმის გზის ფორუმის ფარგლებში 28-29 ნოემბერს ათი პანელი გაიმართება: „მაღალი დონის დიალოგი სარტყელი და გზის კავშირი სტაბილურობისათვის“ (მისასალმებელი პანელი); „ვაჭრობის ხელშეწყობა სარტყელი და გზის ინიციატივების ფარგლებში“ (2 სესია - ვაჭრობის ხელშეწყობა; ელექტრონული ვაჭრობა); „სატრანსპორტო ინფრასტრუქტურა”; „რეგიონთაშორისი შესაძლებლობები ენერგეტიკის მიმართულებით“; „ციფრული კავშირი“; „შესაძლებლობების ახალი კარიბჭე“; „გამოიყენე საინვესტიციო შესაძლებლობები“ (2 სესია - საქართველოს საინვესტიციო და სავაჭრო შესაძლებლობები; საქართველო - რეგიონალური საზღვარი გლობალური ინვესტიციებისათვის); „CAREC 2030: რეგიონის დაკავშირება საერთო და მდგრადი განვითარებისთვის“.

ფორუმის ფარგლებში დაგეგმილ პანელებს მოდერატორობას გაუწევენ მსოფლიოში ცნობილი ექსპერტები და ჟურნალისტები: მერილენდის უნივერსიტეტის თავმჯდომარე, პროფესორი ანილ გუფთა, Reuters-ის მთავარი რედაქტორი აქსელ თრელფოლი, BBC World News ახალი ამბების წამყვანი აარონ ჰესელჰარსტი, E. Treanor Media-ს აღმასრულებელი დირექტორი ეითნი თრინორი, Pillsbury Winthrop Shaw Pittman-ს მრჩეველი მეთიუ ორსმენი, Deutsche Welle TV-ს მთავარი პოლიტიკური კორესპონდენტი მელინდა კრეინი, ცნობილი მედიაკონსულტანტი იან ბიურელი და აზიის განვითარების ბანკის ცენტრალური აზიის რეგიონული თანამშრომლობისა და ოპერაციების კოორდინაციის განყოფილების დირექტორი საფდარ პარვეზი.

თბილისის აბრეშუმის გზის ფორუმს 100-ზე მეტი ჟურნალისტი გააშუქებს - როგორც ქართული, ისე უცხოური მედიის წარმომადგენლები, მათ შორის: Euronews-ი, BBC, Bloomberg-ი, Deutsche Welle, The Economist-ი, Al Jazeera, Guardian-ი და სხვა მედიასაშუალებები.