მერილენდის უნივერსიტეტის პროფესორი აბრეშუმის გზის მნიშვნელობაზე სიტყვით გამოვიდა

თბილისის აბრეშუმის გზის ფორუმი თბილისის ოპერის თეატრში მისასალმებელი პანელით „მაღალი დონის დიალოგი: სარტყელი და გზის კავშირი სტაბილურობისათვის“ გაიხსნა.

პანელს მოდერატორობას უწევს დოქტორი ანილ გუფთა - მერილენდის უნივერსიტეტი თავმჯდომარე, პროფესორი. 

ანილ გუფთამ პანელზე თავის გამოსვლაში ფორუმის მნიშვნელობასა და ზოგადად, ქვეყნებს შორის ეკონომიკური კავშირების მნიშვნელობაზე ილაპარაკა. როგორც მან აღნიშნა, ის დარწმუნებულია, რომ „10-15 წლის შემდეგ ამ ინიციატივას დავინახავთ, როგორც ამ საუკუნის ერთ-ერთ ძალიან ტრანსფორმაციულ და რევოლუციურ ინიციატივას“. 

ანილ გუფთამ თავის სიტყვაში აბრეშუმის გზის ინიციატივის მნიშვნელობას გაუსვა ხაზი და აღნიშნა, რომ „ჩინეთმა დიდი მაგალითი მოგვცა, 1995 წლიდან მისი მშპ-ს დიდი ნაწილის ინვესტირება ხდება ინფრასტრუქტურის განვითარებაში. აბრეშუმის გზის ინიციატივა არის ჩინეთის საგზაო რუკა, რათა თავისი გამოცდილება გააცნოს აზიას, ევროპას, აფრიკას და მისი ეს მცდელობა სურვილს რეალობად გადააქცევს".

პროფესორ გუფთას განცხადებით, გზები, რომლებიც ჩინეთსა და ევროპას შორისაა, კონკურენტულია, „უნდა ვნახოთ, რა არის კონკრეტული მარშრუტის დადებითი მხარეები. უნდა ვნახოთ, ვინ ახორციელებს პროექტებს, რა მასალები, რა დანადგარებია სამუშაო ძალა, როდესაც ამას მივაქცევთ ყურადღებას, მნიშვნელოვანია, რომ ქვეყანა ხელს უწყობდეს ინფრასტრუქტურის განვითარებას... ბევრი ელის ინვესტიციებს ჩინეთიდან, დიდი ალბათობაა, რომ იქნება თანაინვესტირება მაგალითად ევროპის რეკონსტრუქციის და განვითარების ბანკისგან. ეს თანაინვესტორები, მათი მუშაობა ხელს უწყობს ინფრასტრუქტურის განვითარებას“, - განაცხადა მან.

დღეს საქართველოს პრემიერმინისტრმა გიორგი კვირიკაშვილმა თბილისის აბრეშუმის გზის ფორუმზე დელეგატებს სიტყვით მიმართა.

კვირიკაშვილის თქმით, საქართველოსთვის პატივია უმასპინძლოს ასეთი წარმომადგენლობითი დელეგაციების მასპინძლობა. 

აბრეშუმის გზის ფორუმის ფარგლებში 28-29 ნოემბერს ათი პანელი გაიმართება.

თბილისის აბრეშუმის გზის ფორუმს 100-ზე მეტი ჟურნალისტი გააშუქებს - როგორც ქართული, ისე უცხოური მედიის წარმომადგენლები, მათ შორის: Euronews-ი, BBC, Bloomberg-ი, Deutsche Welle, The Economist-ი, Al Jazeera, Guardian-ი და სხვა მედიასაშუალებები.