აბრეშუმის გზის ფორუმზე ანაკლიის ეკონომიკური ზონის პროექტი წარადგინეს

დღეს „თბილისის აბრეშუმის გზის“ ფორუმის ფარგლებში “ანაკლია სითის“ აღმასრულებელმა დირექტორმა ქეთი ბოჭორიშვილმა ქალაქ ანაკლიისა და სპეციალური ეკონომიკური ზონის პროექტი წარადგინა. დისკუსიაში, რომელიც საქართველოს საინვესტიციო შესაძლებლობებს ეხებოდა, ბოჭორიშვილმა  ქალაქ ანაკლიასა და ეკონომიკურ ზონაზე, როგორც სტრატეგიული რეგიონული კვანძის  პოტენციალზე, გაამახვილა ყურადღება.

„ქალაქი ანაკლია და სპეციალური ეკონომიკური ზონა, ისევე როგორც ღრმაწყლოვანი პორტი, ჩვენი სავაჭრო და სატრანსპორტო შესაძლებლობებით, აბრეშუმის გზის ინიციატივის მნიშვნელოვანი ნაწილია. ჩვენ მიგვაჩნია, რომ ანაკლიის პროექტი მდებარეობს უმოკლეს მარშრუტზე ევროპასა და აზიას შორის და გვაქვს ამბიცია, გავხდეთ სავაჭრო, სატრანსპორტო და ბიზნეს კვანძი რეგიონში აბრეშუმის გზის და სხვა საერთაშორისო კორიდორებისთვის. სტრატეგიული ლოკაციითა და მზარდი შესაძლებლობებით, საქართველოს აქვს შესაძლებლობა გახდეს მნიშვნელოვანი საივნესტიციო წერტილი არაერთი მულტინაციონალური კომპანიისთვის მომავალ წლებში,“ -  განაცხადა ბოჭორიშვილმა.

“ანაკლიის განვითარების კონსორციუმი” ფორუმის ერთ-ერთი მთავარი პარტნიორი და სპონსორია.  ფორუმის ფარგლებში სხვადასხვა სადისკუსიო პანელზე ანაკლია განხილული იქნება, როგორც აბრეშუმის გზის ერთ-ერთ სტრატეგიული პროექტი შუა კორიდორის განვითარებაში, მნიშვნელოვანი გზაჯვარედინი და საქართველოს ახალი შესაძლებლობა. 28 ნოემბერს ფორუმის ფარგლებში ანაკლიის ღრმაწყლოვანი პორტის პროექტი „ანაკლიის განვითარების კონსორციუმის“ დირექტორმა ლევან ახვლედიანმა წარადგინა.

28 ნოემბერს, ფორუმის ფარგლებში ანაკლიის პორტის მენეჯმენტმა თანამშრომლობის მემორანდუმები გააფორმა ბაქოსა და კურიკის (ყაზახეთი) პორტებთან.