პრემიერი: აბრეშუმის გზის ფორუმზე 10-მდე მნიშვნელოვანი შეთანხმება გაფორმდა

"აბრეშუმის გზის ფორუმის ფარგლებში 10-მდე მნიშვნელოვანი შეთანხმება გაფორმდა," - ეს განცხადება პრემიერმინისტრმა გიორგი კვირკაშვილმა მთავრობის სხდომაზე გააკეთა. მან თბილისში გამართული „აბრეშუმის გზის ფორუმი“ შეაფასა და ქვეყნის ეკონომიკის პერსპექტივებზე ილაპარაკა.

" იყო უამრვი ორმხრივი შეხვედრა ადგილობრივი საქმიანი წრეების წარმომადგენლებთან. ფორუმს ესწრებოდა 2 პრემიერმინისტრი - უკრაინისა და მოლდოვის, ასევე ესწრებოდნენ ვიცეპრემიერები ყაზახეთიდან, სლოვენიიდან, ჩვენი მეგობარი ქვეყნების მინისტრები, საერთაშორისო საფინანსო ინსტიტუტების წარმომადგენლები ვიცეპრეზიდენტების დონეზე, რაც ძალიან მნიშვნელოვანია და რა თქმა უნდა, უამრავი მსხვილი კომპანია იყო საქართველოში ჩამოსული, გაფორმდა ძალიან ბევრი მნიშვნელოვანი ხელშეკრულება. გამოვყოფ რამდენიმეს, ესენია: ევროპის სანვესტიციო ბანკს, ევროპის საინვესტიციო ფონდს და ქართულ ბანკებს შორის გაფორმებული ხელშეკრულება, რისი მეშვეობითაც საქართველოში მცირე და საშუალო ზომის, მათ შორის, ინოვაციური საწარმოების მხარდაჭერის მიზნით 90 მილიონი ევრო იქნება გამოყოფილი ფინანსური რესურსი,"- განაცხადა პრემიერმა. 

კვირიკაშვილის თქმით, ფორუმის ფარგლებში ასევე დაფუძნდა საქართველოს მშენებლობის ეროვნული ფონდი, რომელიც არის შანხაის უმსხვილესი ენერგეტიკული კომპანისა და საპარტნიორო ფონდის ერთობლივი პროექტი.

"მშენებლობის ეროვნული ფონდი, რომელიც ბიზნესპროექტების განსახორციელებლად ქვეყანაში შექმნის ახალ საინვესტიციო პლატფორმას და იქნება მყარი ფინანსური ინსტრუმენტი იმისთვის, რომ ახალი მნიშვნელოვანი პროექტები დაფინანსდეს. ეს არის ასევე საქართველოსა და ჩინეთის სახალხო რესპუბლიკას შორის ეკონომიკური ზონების განვითარებისა და სამეწარმეო სიმძლავრეების ხელშეწყობის სფეროში თანამშრომლობის შესახებ მემორანდუმი, რომლის მიზანიც არის საწარმოებისთვის თანამშრომლობის პლატფორმის მშენებლობა და განვითარება საქართველოში",- განაცხადა პრემიერმინისტრმა.

თბილისის „აბრეშუმის გზის ფორუმი“ მისასალმებელი პანელით „მაღალი დონის დიალოგი: სარტყელი და გზის კავშირი სტაბილურობისათვის“ 28 ნოემბერს გაიხსნა. ფორუმს 60-ზე მეტი ქვეყნის 2000-მდე დელეგატი ესწრებოდა.