ვახტანგ ცინცაძე: ის ეკონომიკური რეფორმები, რომლებიც უშუალოდ ეკონომიკის სტრუქტურის ტრანსფორმაციისკენაა მიმართული, საქართველოს მისცემს შესაძლებლობას, გააგრძელოს მაღალი ეკონომიკური ზრდის ტენდენციები მომავალი წლების განმავლობაში

ის ეკონომიკური რეფორმები, რომლებიც უშუალოდ ეკონომიკის სტრუქტურის ტრანსფორმაციისკენაა მიმართული, საქართველოს მისცემს შესაძლებლობას, გააგრძელოს მაღალი ეკონომიკური ზრდის ტენდენციები მომავალი წლების განმავლობაში, - განაცხადა განაცხადა გადაცემაში „დღის ქრონიკა“ ეკონომიკისა და მდგრადი განვითარების მინისტრის მოადგილემ ვახტანგ ცინცაძემ.

მან საქართველოს ეკონომიკის ზრდის იმ პროგნოზებზე ისაუბრა, რომლებსაც საერთაშორისო საფინანსო ინსტიტუტები აკეთებენ.

„სულ ახლახან საერთაშორისო სავალუტო ფონდმა გაზარდა საქართველოს ეკონომიკური ზრდის პროგნოზი 7.2%-მდე. ასევე, ევროკომისია თავის ანგარიშში ხაზგასმით აღნიშნავს, რომ საქართველოს ეკონომიკის განვითარება იქნება საკმაოდ ჯანსაღი და ძლიერი, ეკონომიკა არის საკმაოდ დივერსიფიცირებული. მაგალითად, 2025 წლისთვის მნიშვნელოვანი სექტორები, რომლებსაც ეკონომიკის ზრდაში მნიშვნელოვანი პოზიტიური წვლილი შეაქვს, არის ინფორმაციისა და კომუნიკაციის, ტრანსპორტისა და დასაწყობების, განათლების. ამ სექტორების ზრდა საკმაოდ მაღალია და მოსალოდნელია, რომ საქართველოს ეკონომიკა მომდევნო პერიოდშიც შეინარჩუნებს ამ კონკურენტულ უპირატესობას, რაც საქართველოს მისი გეოგრაფიული ადგილმდებარეობიდან გამომდინარე გააჩნია, ვსაუბრობ მათ შორის შუა დერეფნის ნაწილზე და ტრანსპორტის სექტორის შემდგომ ზრდაზე“, - განაცხადა მინისტრის მოადგილემ.

მან ასევე ისაუბრა იმ რეფორმებზე, რომლებსაც ეკონომიკის პროდუქტიულობის ზრდის კუთხით საქართველოს მთავრობა ახორციელებს.

„ჩვენ ვხედავთ, რომ ბოლო წლებში საქართველოს ეკონომიკის პროდუქტიულობა საკმაოდ მნიშვნელოვნად არის გაზრდილი. ის ეკონომიკური რეფორმები, რომლებიც უშუალოდ ეკონომიკის სტრუქტურის ტრანსფორმაციისკენაა მიმართული, საქართველოს მისცემს შესაძლებლობას, გააგრძელოს მაღალი ეკონომიკური ზრდის ტენდენციები მომავალი წლების განმავლობაში.
რეფორმებთან დაკავშირებით შეგვიძლია, აღვნიშნოთ, რომ სახელმწიფო საწარმოების რეფორმა ერთ-ერთი უმნიშვნელოვანესი რეფორმაა, რომელსაც საქართველოს მთავრობა ახორციელებს და რომელიც კიდევ უფრო შეუწყობს ხელს შემდგომ პროდუქტიულობის ზრდას და ქვეყნის ეკონომიკური ზრდის დაჩქარებას“, - განაცხადა ვახტანგ ცინცაძემ.

ამასთან, მინისტრის მოადგილემ ეკონომიკის ზრდის იმ პროგნოზზეც ისაუბრა, რომელიც უშუალოდ სამინისტროს აქვს.

„ჩვენ ველოდებით, რომ 2025 წელს საქართველოს ეკონომიკური ზრდა იმაზე მაღალი იქნება, ვიდრე ამას საერთაშორისო საფინანსო ინსტიტუტები ვარაუდობენ.

ჩვენი მოლოდინია, რომ რომ საქართველოს ეკონომიკა 2025 წელს დაახლოებით 7.5%-ით გაიზრდება და ამის ხელშემწყობი იქნება მათ შორის ის ტენდენციები, რომლებიც საქართველოს ეკონომიკაში ფიქსირდება. ვსაუბრობ კონკრეტულად იმ კონკურენტულ უპირატესობაზე, რაც საქართველოს აქვს ერთი მხრივ, როგორც შუა დერეფნის კორიდორის განვითარების კუთხით, ასევე იმ მაღალ კაპიტალურ ხარჯებზე, რომლებსაც საქართველოს ეკონომიკა შეინარჩუნებს მომდევნო წლებში იმ მსხვილი პროექტების განხორციელების კუთხით, რომლებიც საქართველოს ეკონომიკისთვის იქნება ტრანსფორმაციული“, - აღნიშნა მინისტრის მოადგილემ.