გია არაბიძე: ტარიფის ზრდა დარგის განვითარებისთვის გამართლებული იქნება

„თუ სხვა მატებაზე არ იქნება საუბარი, 2023 წლამდე არსებული ელექტროენერგიის ტარიფის დაბრუნება მაინც, აუცილებლად მიმაჩნია. ტარიფის ზრდა დარგის განვითარებისთვის გამართლებული იქნება”, - განაცხადა ენერგეტიკოსმა გია არაბიძემ სემეკში, 30 მარტს დაგეგმილ საჯარო სხდომასთან დაკავშირებით, სადაც ელექტროენერგიის ტარიფებზე იმსჯელებენ.

მისი თქმით, ტარიფის ზრდა დარგის განვითარებისთვის და იმპორტის მინიმიზაციისთვის საჭიროა.

„ჩვენს დარგს ტარიფის მომატება აუცილებლად სჭირდება, რათა არსებული პრობლემები გადაიჭრას, მათ შორის, ინვესტიციების და ტექნიკური ნაწილის გაუმჯობესების კუთხით. ჩვენს დარგს ასევე, აქვს სოციალური დატვირთვა და როდესაც სემეკი ამბობს, რომ ბალანსი დაცულია - ყოველთვის ცდილობს დაიცვას ბალანსი მწარმოებელს, ენერგოკომპანიასა და მომხმარებლებს შორის. გამოსავალია ის, რომ მომხმარებლებმა შეძლონ ამ პროდუქტის მიღება და გამოყენება, ხოლო ენერგოკომპანიებმა შეძლონ მუშაობის გაგრძელება.

დარგის განვითარების გარდა, იანვარში 1200 მეგავატამდე ავიდა ჩვენი იმპორტი, ამიტომ ამის მინიმიზაცია, რომ გაკეთდეს აუცილებელია გენერაციის გაზრდა, რისთვისაც აუცილებელია სადგურების მშენებლობა, ხოლო ამისთვის აუცილებელია ინვესტიცია. ამას გარდა, იმისათვის, რომ სრულფასოვნად შემოვიდეს ენერგიის განახლებადი წყაროებიდან ნაწარმოები ელექტრული ენერგია ჩვენს სისტემაში, ამისათვის აუცილებელია სარეზერვო სიმძლავრეები", - აცხადებს გია არაბიძე.

ცნობისთვის, სემეკმა დროებითი ტარიფი დაადგინა, შედეგად ელექტროენერგიაზე არსებული ტარიფი შემდეგი 3 თვის განმავლობაში შენარჩუნდა - აღნიშნული 3 თვე კი, მარტის ბოლოს იწურება.

როგორც 2025 წლის ბოლოს ენერგეტიკისა და წყალმომარაგების მარეგულირებელი კომისიის თავმჯდომარე დავით ნარმანიამ ჟურნალისტებს განუცხადა, პროცესის 3 თვით გადავადებას ელექტროენერგიის გამანაწილებელმა კომპანიებმა ითხოვეს.

ამასთან, როგორც ნარმანიამ აღნიშნა, ტარიფებთან დაკავშირებით კონსულტაციები ჰქონდათ საქართველოს პრემიერ-მინისტრთან.

ამ დროისთვის თბილისში მცხოვრები აბონენტები, რომლებიც ყოველთვიურად 0-დან 101 კილოვატამდე ელექტროენერგიას მოიხმარენ ერთ კილოვატში 15,041 თეთრს იხდიან.

შეგახსენებთ, რომ 2024 წლის პირველი იანვრიდან, სემეკის გადაწყვეტილებით, თბილისის და საქართველოს რეგიონებისთვის ელექტროენერგიის საყოფაცხოვრებო ტარიფები 3 თეთრით შემცირდა.

კერძოდ, თელმიკოს მომხმარებლებისთვის 0-დან 101 კილოვატის ჩათვლით დენის ტარიფი გახდა 15 თეთრი 18 თეთრის ნაცვლად, 101-დან 301 კილოვატამდე მომხმარებლებისთვის 19 თეთრი 22 თეთრის ნაცვლად, ხოლო 301 კილოვატზე მეტის შემთხვევაში, ტარიფი გახდა 23.5 თეთრი 26 თეთრის ნაცვლად.

„ენერგო-პროს" მომხმარებლებისთვის 0-დან 101 კილოვატის ჩათვლით დენის ტარიფი გახდა 14,7 თეთრი 17.7 თეთრის ნაცვლად, 101-დან 301 კილოვატამდე მომხმარებლებისთვის 15.7 თეთრი 18.7 თეთრის ნაცვლად, ხოლო 301 კილოვატზე მეტს ვინც მოიხმარს მათთვის ტარიფი გახდა 23.2 თეთრი 26.2 თეთრის ნაცვლად.

ინფორმაციას სემეკი ავრცელებს.