Bitfury ჯგუფი: ელექტროენერგიის გაძვირება ჩვენი მაინინგის ცენტრებს არ უკავშირდება

Bitfury ჯგუფის წარმომადგენლობა საქართველოში ევროპული საქართველოს ბრალდებებს პასუხობს და განცხადებას ავრცელებს. წარმომადგენლობის თქმით, ჯგუფი საქართველოში მაინინგის ცენტრებს ფლობს, მაგრამ გორში მაინინგი დიდი ხანია აღარ ხდება. 

"გვსურს ღიად დავაფიქსირო ოფიციალური პოზიცია, რომ კომპანია ბიტფიური რომელიც უმსხვილესი გლობალური ტექნოლოგიური კომპანიაა (თითქმის ერთ მლრდ კაპიტალიზიაციით) 2014-2015 წწ “ბიტფიური ჯგუფი” სარგებლობდა სესხით “თანაინვესტირების ფონდიდან”, რომელიც 2015 წელს ჩანაცვლდა “საქართველოს ბანკისგან” (BOG) მიღებული საბანკო სესხით, ვისთანაც დღემდე ვიმყოფებით ფინანსურ-საქმიან ურთიერთობაში.

ისლანდიის, ნორვეგიის და კანადის მსგავსად, საქართველოში “ბიტფიური ჯგუფი” ფლობს მაინინგის ცენტრებს, მაგრამ გორში მაინინგი დიდი ხანია აღარ ხდება, შესაბამისად, იქ ჭარბი ელექტროენერგიის საჭიროება არ არსებობს (იქ მხოლოდ ტექნიკური მხარდაჭერის ცენტრია) და მხოლოდ თბილისის (გლდანის რაიონში მდებარე) დატა ცენტრში მიმდინარეობს მაინინგი.

რაც შეეხება დენის საფასურს, მის გადახდებს, ტარიფებს და შესაძლოა პრივილეგიებს, რაზეც ჩვეულად და თავის სტილში აპელირებენ ქართველი პოლიტიკოსების ნაწილი, აქაც მთელი პასუხისგებლობით გვსურს განვაცხადოთ, რომ საქართველოში ოპერირების დაწყებიდან დღემდე, არცერთ ეტაპზე ”ბიტფიური ჯგუფს” არ უსარგებლია არანაირი პროვილეგიით ან შეღავათით.

ამის დასტურად ჩვენი კომპანია – მიმდინარე კვირის ბოლომდე გამოაქვეყნებს-კომუნალური (ელექტროენერგიის შესყიდვა-გადახდის) გადასახადების შესახებ დეტალურ ინფორმაციას", – წერია განცხადებაში.

შეგახსენებთ, რომ დენის ტარიფის გაძვირებას ევროპული საქართველო გლდანში მდებარე ბიტკოინის მაინინგისთვის საჭირო ცენტრს უკავშირებენ.

მაინინგი ციფრული ვალუტის ახალი მონეტების შექმნის და ტრანზაქციების განხორციელებისთვის აუცილებელი პროცესია. ეს არის სქემა, რომელიც გულისხმობს უამრავ გამოთვლით ოპერაციას, რაზეც ძალიან დიდი რაოდენობით ენერგია იხარჯება.

საქართველო ბიტკოინის მომპოვებელი ე.წ. მაინერების რაოდენობით, ჩინეთთან და აშშ-სთან ერთად, მსოფლიო სამეულში შედის. ბიტკოინის მაინერი კომპანიები ისეთ ქვეყნებშია თავმოყრილი, რომლებშიც ტექნოლოგიები ძალიან განვითარებულია, ელექტროენერგია კი - იაფი.