არღვევენ თუ არა Google-ში თანამშრომლების უფლებებს. სტატისტიკა

2018 წლია 9 იანვარს ჯეიმს დეიმორმა და Google-ის კიდევ ერთმა ყოფილმა თანამშრომელმა დევიდ გუდმენმა კომპანია თეთრკანიანი, კონსერვატორი თანამშრომლებისადმი შეუწყნარებლობაში დაადანაშაულეს და მას სასამართლოში უჩივლეს. მოსარჩელეების თქმით, კომპანიაში არსებობს კვოტები ეთნიკური უმცირესობებისა და ქალებისთვის, რაც თეთრკანიან კაცებს აფიქრებინებს, რომ ნაკლებად ღირებული თანამშრომლები არიან.

ჯეიმს დეიმორი Google-ში 2013 წლიდან ინჟინრად მუშაობს. ის იმ მანიფესტის ავტორია, რომელიც 2017 წლის აგვისტოში, კომპანიის ერთ-ერთი თანამშრომლის სახელით ანონიმურად გავრცელდა, და რომელშიც ეწერა, რომ Google-ის მიმდინარე პოლიტიკა სამსახურში ქალების და სხვადასხვა ეთნიკური წარმომავლობის ადამიანთა დასაქმებაზე არაეფექტიანი და მცდარი იყო. კომპანიამ განაცხადა, რომ დეიმორის პოზიცია და მისი მცდარი გენდერული წარმოდგენები კორპორაციის წესებს ეწინააღმდეგებოდა და 8 აგვისტოს ის სამსახურიდან გაათავისუფლა.

იმავდროულად, სან-ფრანცისკოში ახლა განიხილება Google-ის ოთხი ყოფილი თანამშრომელი ქალის კოლექტიური სარჩელი, რომლებიც კომპანიას შრომის უსამართლო ანაზღაურებაში სდებენ ბრალს.  

თავად Google დისკრიმინაციის ბრალდებებს უარყოფს და აცხადებს, რომ ყველაფერს აკეთებს კომპანიაში თანამშრომლებში თანასწორობის მისაღწევად. 

კომპანიის 2017 წლის ანგარიშში ნათქვამია, რომ შარშანდელი წლის განმავლობაში თანამშრომლების 69% - კაცები არიან, აქედან ნახევარზე მეტი - თეთრკანიანია (ბოლო რამდენიმე წლის განმავლობაში სიტუაცია უმნიშვნელოდ შეიცვალა). კომპანიის ხელმძღვანელობაში ეს თანაფარდობა კიდევ უფრო გამოკვეთილია: Google-ის ტოპ-მენეჯერების 75% კაცია და თითქმის ყველა თეთრკანიანია. 

კომპანიას ასეთი ვითარება უსამართლოდ მიაჩნია და ქალების და სხვადასხვა ეთნიკური წარმომავლობის ადამიანებისათვის IT-სფეროში სხვადასხვა პროგრამებს ნერგავს. კერძოდ, ის კარნეგი-მელონის უნივერსიტეტის გამოცდილებას ეყრდნობა, რომელმაც კულტურული და სოციალური წესების შეცვლით, ბოლო ათი წლის განმავლობაში შეძლო ბევრად მეტი ქალი პროგრამისტის გამოშვება, ვიდრე სხვა უნივერსიტეტებმა.     

Google ასევე ამტკიცებს, რომ 2017 წელს კომპანიამ ფაქტობრივად სრულად აღმოფხვრა სხვაობა ქალების და კაცების ანაზღაურებას შორის: Google-ის კაცი თანამშრომლის მიერ გამომუშავებულ ტიტოეულ დოლარზე, ქალი თანამშრომელი 99,7 ცენტს იღებს. აშშ-ის შრომის დეპარტამენტს ასე არ მიაჩნია: დეპარტამენტის გამოძიებამ აჩვენა, რომ Google-ში სისტემატურად შეიმჩნევა ანაზღაურებაში სხვაობა სქესის მიხედვით, ამასთან ეს ფაქტობრივად ყველა ტიპის თანამშრომელს ეხება. ამას სტატისტიკაც ადასტურებს, რომელიც თავად Google-ის თანამშრომლების მომზადებულია: 1200 ადამიანმა, რაც კომპანიის თანამშრომლების დაახლოებით 2%-ია, თავისი სახელფასო მონაცემები გაასაჯაროეს და აღმოჩნდა რომ ერთსა და იმავე თანამდებობაზე ქალებს კაცებზე ნაკლებს უხდიან. მაგალითად, “პირველი დონის” თანამშრომელი ქალების ანაზღაურება წელიწადში საშუალოდ 40,3 ათასი დოლარია, ხოლო კაცი თანამშრომლების - 55,9 ათასი დოლარი.