თამარ იოსელიანი: შანხაი ძალიან მნიშვნელოვანი და პრიორიტეტული მიმართულებაა, რადგანაც არის ფინანსური და ეკონომიკური ცენტრი

შანხაი არის ჩვენთვის ძალიან მნიშვნელოვანი და პრიორიტეტული მიმართულება, რადგანაც არის ფინანსური და ეკონომიკური ცენტრი, - ასე აფასებს ეკონომიკისა და მდგრადი განვითარების მინისტრის მოადგილე, თამარ იოსელიანი საქართველოს ავიაბაზარზე კიდევ ერთი ჩინური ავიაკომპანიის China Eastern Airlines-ის შემოსვლას, რომელიც შანხაი-თბილისი-შანხაის საჰაერო ხაზზე მოახდენს ოპერირებას.

როგორც თამარ იოსელიანი აცხადებს, დღეიდან საქართველოს დედაქალაქი პირდაპირი ავიამიმოსვლით დაუკავშირდება შანხაის.

„შანხაი არის ასევე ჰაბი აზიაში, რომელიც შემდგომ მოგვცემს შესაძლებლობას, რომ სხვა მიმართულებებზეც მოხდეს დაკავშირება. ძალიან მნიშვნელოვანია ზოგადად ჩინეთის სახალხო რესპუბლიკასთან საქართველოს თანამშრომლობის კონტექსტის აღნიშვნა. ჩვენ გადავედით სტრატეგიულ თანამშრომლობაზე, გაღრმავდა თანამშრომლობა, შესაბამისად, ეს არის ერთ-ერთი ის შედეგი, რომელიც მოიტანა ამ სტრატეგიულმა თანამშრომლობამ“, - აღნიშნა თამარ იოსელიანმა.

მინისტრის მოადგილის განცხადებით, საავიაციო სექტორში ჩინეთთან დაკავშირებადობა ძალიან პოზიტიურია.

„როგორც იცით, ჩინეთიდან საქართველოს მიმართულებით სამი ავიაკომპანია ოპერირებს და კვირაში უკვე 13-ის სიხშირით იქნება შესაძლებელი, რომ ჩინეთს დავუკავშირდეთ. ეს შესაძლებლობას მოგვცემს, რომ ჩინეთთან გავაღრმაოთ როგორც ბიზნეს ურთიერთობები, ასევე ხალხთაშორისი კავშირები და ტურისტული ნაკადები მოვიზიდოთ, რაც დამატებითი შემოსავლების წყარო ხდება ჩვენი ეკონომიკისთვის“, - აღნიშნა თამარ იოსელიანმა.

მისივე განმარტებით, ბოლო პერიოდში ჩინეთიდან მზარდია როგორც ტურისტების რაოდენობა ასევე მგზავრთნაკადიც.

„პირველ კვარტალში ძალიან კარგი ტენდენცია გვაქვს და შეიძლება ითქვას, პირველ ნახევარშიც, დაახლოებით, 50%-იანი მატება გვაქვს ზოგადად მგზავრთნაკადის თვალსაზრისით, 44%-იანი მატება გვაქვს ტურისტული მიმართულებით. წინა წელსაც, დაახლოებით 45%-იანი მატება გვქონდა. შესაბამისად, ამ მიმართულებით ტენდენცია ძალიან მზარდია, რასაც ხელს უწყობს როგორც უვიზო მიმოსვლა ჩინეთთან, ასევე ის კამპანიები, რომლებსაც ტურიზმის ეროვნული ადმინისტრაცია ახორციელებს ჩინეთის ბაზარზე. დაახლოებით, 7 მილიონი ლარის მარკეტინგული კამპანიები ჩაეშვა, რაც ხელს უწყობს საქართველოს ცნობადობის ამაღლებას და შესაბამისად ეს უკვე ციფრებში აისახება. დარწმუნებული ვარ, რომ ახალი საჰაერო ხიდიც მოგვცემს შესაძლებლობას, რომ გავაღრმაოთ ურთიერთობები და შესაბამისად მოვიზიდოთ როგორც ტურისტები, ასევე ბიზნესურთიერთობები გავაღრმაოთ შანხაისთან და ჩინეთის სახალხო რესპუბლიკასთან“, - განაცხადა იოსელიანმა.